Jambyl: jarylystan mezi bolǵandar basqa jerge kóshirýdi talap etýde

403

Jambyl oblysyndaǵy áskerı bólimdegi jarylystan mezi bolǵan Qaınar aýylynyń turǵyndary bılikten basqa jerge kóshirýdi talap etip otyr, dep habarlady “Adyrna” ulttyq portaly KTK.telearnasyna silteme jasap.

Olar 10 qazanda bolǵan jarylystan qatty shoshynyp qalǵan.

10 qazanda tańǵy saǵat jeti shamasynda Baızaq aýdanyndaǵy áskerı bólimde taǵy da joıqyn jarylys boldy. "Gúrs" etken daýysty estigen turǵyndar uıqydan tura sala jan-jaqqa qasha jónelgen. Keıin bári basylǵan soń baspanalaryna qaıta oraldy.

Al shuǵyl jınalǵan áskerıler men sheneýnikter jurtty sabyrǵa shaqyryp álekke tústi. Olardyń sózine sensek, burynǵy órtten zaqymdalǵan oq-dáriler jarylǵan.

Buǵan deıin de alańdamaýǵa shaqyrǵan bılik ókilderiniń sózine turǵyndar endi kúmánmen qaraıdy.

"Jarylys taǵy qaıtalanatyn bolsa, bizdi kóshirsin basqa jaqqa. Aqyry ózderi senimsiz. Kóshirsin, bul jerde turmaımyz. Qalatyndar qala bersin, árkimniń óz erki", - deıdi aýyl turǵyny Janar Súıindikova.

Resmı málimetke súıensek, eshbir adam jaraqat almaǵan jáne eshqandaı ǵıramatqa zaqym kelmegen. Biraq turǵyndar keıbir úıdiń terezeleri synǵanyn kórsetti.

Jergilikti bılik jurtqa qaýip bar ekenin túsingen tárizdi. Óıtkeni Qaınar aýylynan turǵyndar túgel shyǵarylǵan. 37 adam týystaryn panalaýǵa májbúr. Tipti eldimekendegi qıraǵan baspanalardy qalpyna keltirý jumystary da ýaqytsha toqtady.

"Qarqyndy jumys júrgizilip jatyr. Josparly jarylystar bolýy da múmkin. Soǵan baılanysty ázirge turǵyndardy ishke kirgizbeımiz. Iaǵnı bir mezette úıindilerdi jarý boıynsha sharalar qabyldanyp jatyr. Taý bolyp úıilgen zaqymdalǵan oq-dárilerdi joıyp jiberý kózdelgen. Alaıda ol úshin qurylǵan arnaıy komıssııa sheshim shyǵarýǵa tıis. Tek sodan keıin jumys júzege asyrylady", - deıdi Baızaq aýdany ákiminiń orynbasary Qaırat Ismaıyl. 

Al ázirge aýyl turǵyndary jaqyndarynyń úıinde júre beredi. Qashan óz úılerine oralatyny belgisiz.

Áskerı bólimniń mańyna qazir eshkimdi jolatpaı jatyr. Qaýipsizdik sharalary kúsheıtilgen. Qaınar aýylyna kire beriste bolok-beketter qoıylyp, polıeıler erteli kesh kúzetip tur.

”Adyrna” ulttyq portaly

Pikirler
Uqsas jańalyqtar