ورال قالاسى اكىمدىگىنىڭ، مەملەكەتتىك كىرىستەر جانە قالالىق پوليتسيا باسقارمالارىنىڭ بىرقاتار لاۋازىمدى تۇلعالارى بۇقارالىق ونلاين-بۋكمەكەرلىك پلاتفورمالار ارقىلى قۇمار ويىندارعا قاتىسقانى ءۇشىن جاۋاپكەرشىلىككە تارتىلدى، دەپ حابارلايدى "ادىرنا" ۇلتتىق پورتالى.
2024 جىلدىڭ 15 ناۋرىزىندا اتىراۋدا وتكەن ۇلتتىق قۇرىلتاي وتىرىسىندا پرەزيدەنت قاسىم-جومارت توقاەۆ مەملەكەتتىك قىزمەتشىلەردىڭ قۇمار ويىندارعا قاتىسۋىنا تىيىم سالۋ جونىندە تاپسىرما بەرگەن بولاتىن. وسىعان بايلانىستى 2024 جىلعى 9 قىركۇيەكتەن باستاپ زاڭناماعا وزگەرىستەر ەنگىزىلىپ، مەملەكەتتىك قىزمەتشىلەردىڭ ءباس تىگۋى سىبايلاس جەمقورلىققا قارسى شەكتەۋلەردى بۇزۋ رەتىندە تانىلادى.
پروكۋراتۋرا جۇرگىزگەن تالداۋ ناتيجەسىندە ورال قالاسى اكىمدىگى، مەملەكەتتىك كىرىستەر باسقارماسى جانە پوليتسيا باسقارماسىنداعى كەيبىر قىزمەتكەرلەردىڭ بۋكمەكەرلىك كەڭسەلەر ارقىلى قۇمار ويىندارعا قاتىسقانى انىقتالعان.
"قاداعالاۋ ناتيجەسىندە 24 شەنەۋنىك تارتىپتىك جاۋاپكەرشىلىككە تارتىلىپ، 16 قىزمەتكەر جۇمىستان بوساتىلدى", – دەپ حابارلادى بقو پروكۋراتۋراسى.
اتاپ ايتقاندا، «OLIMPBET» كومپانياسىنىڭ مالىمەتىنشە، ورال قالاسى اكىمدىگىنىڭ ءبىر قىزمەتكەرى 2021 جىلعى 5 ماۋسىمنان 2025 جىلعى 22 قاڭتارعا دەيىن ءوزىنىڭ جەكە شوتىنا 34 ميلليون تەڭگەدەن استام قاراجات سالىپ، ونىڭ ءبىر بولىگىن ۇتىلعان. زاڭناما كۇشىنە ەنگەننەن كەيىن ول 1,7 ميلليون تەڭگە سالىپ، ونىڭ 971 مىڭ تەڭگەسىن جوعالتقان. وسى فاكتىلەرگە بايلانىستى اتالعان قىزمەتكەر لاۋازىمىنان بوساتىلدى.
