قىرعىزستان پرەزيدەنتى سادىر جاپاروۆ بۇقارالىق اقپارات قۇرالدارى مەن ينتەرنەتتە جالعان اقپارات تاراتقاندارعا ايىپپۇل سالۋدى كوزدەيتىن زاڭعا قول قويدى، دەپ حابارلايدى «ادىرنا» ءتىلشىسى.
«پرەزيدەنت سادىر جاپاروۆ قىرعىز رەسپۋبليكاسىنىڭ قۇقىقبۇزۋشىلىقتار تۋرالى كودەكسىنە وزگەرىستەر ەنگىزۋ تۋرالى زاڭعا قول قويدى»،– دەلىنگەن حابارلامادا.
زاڭناماعا ەنگىزىلگەن وزگەرىستەر باق پەن ينتەرنەتتە جالعان اقپارات تاراتقانى ءۇشىن ايىپپۇل سالۋدى قاراستىرادى. مۇنداي قۇقىقبۇزۋشىلىقتار ءۇشىن جەكە تۇلعالارعا سوت شەشىمىمەن 20 مىڭ قىرعىز سومى (شامامەن 119 مىڭ تەڭگە — رەد.), ال زاڭدى تۇلعالارعا – 65 مىڭ سوم (شامامەن 388 مىڭ تەڭگە — رەد.) كولەمىندە ايىپپۇل سالىنادى.
«زاڭنىڭ ماقساتى – اقپاراتتىق قاۋىپسىزدىكتى قامتاماسىز ەتۋ جانە ازاماتتاردىڭ شىنايى، وبەكتيۆتى اقپارات الۋعا دەگەن قۇقىقتارىن قورعاۋ»،—دەلىنگەن رەسمي حابارلامادا.
