الەۋمەتتىك جەلىلەردە الماتىداعى "مەدەۋ" سپورت كەشەنى اۋماعىنان ۇشىپ شىققان "قازاۆياقۇتقارۋ" تىكۇشاعىنىڭ ۆيدەوسى تارادى، دەپ حابارلايدى "ادىرنا" ۇلتتىق پورتالى.
كۋاگەرلەردىڭ ايتۋىنشا، اۋەگە كوتەرىلۋ كەزىندە اۋە كولىگى بىرنەشە رەت قيسايىپ، اعاشتىڭ بۇتاقتارىنا دا تيگەن. كوپشىلىك بولعان جاعدايدان قاتتى قورقىپ قالعان.
كادرلاردا تىكۇشاقتىڭ دەرەۋ كوتەرىلە الماي، تەپە-تەڭدىگىن ساقتاي الماي جاتقان ساتتەرى انىق كورىنەدى.
"ازاماتتاردى قاۋىپسىز قاشىقتىقتا بولۋعا الدىن الا ەسكەرتكەنبىز" – دەيدى ماماندار.
"قازاۆياقۇتقارۋ" اكتسيونەرلىك قوعامىنىڭ ءباسپاسوز قىزمەتى تىكۇشاق ۇشۋىنىڭ الدىن الا جوسپارلانعانىن جانە رەسمي ۇشۋ الاڭىنان جۇزەگە اسقانىن حابارلادى.
"ۇشار الدىندا بورتمەحانيك ازاماتتارعا قاۋىپسىزدىك شارالارىن ساقتاۋ قاجەتتىگىن ەسكەرتكەن", – دەپ مالىمدەدى كومپانيا وكىلدەرى.
الدىن الا مالىمەتكە سايكەس، ۇشۋ كەزىندە جەلدىڭ باعىتى مەن كۇشى كۇرت وزگەرىپ، بۇل تىكۇشاقتىڭ تۇراقتىلىعىنا اسەر ەتۋى مۇمكىن. وقيعانىڭ ناقتى سەبەپتەرى "قازاۆياقۇتقارۋ" جۇرگىزىپ جاتقان ىشكى تەكسەرىس ناتيجەسىندە انىقتالماق.
"وقيعادان كەيىن جەدەل ارەكەت ەتۋ توبى اۋە كەمەسىن تەكسەرىپ، تەحنيكالىق اقاۋلار انىقتالمادى", – دەدى مەكەمە.
