III شۋشا جاھاندىق مەديافورۋمى اياسىندا ازەربايجان پرەزيدەنتى يلحام اليەۆ ۋكراينانى وككۋپاتسياعا كونبەۋگە شاقىردى، دەپ حابارلايدى "ادىرنا" ۇلتتىق پورتالى.
اليەۆ ءتۇرلى ەلدەردىڭ تانىمال ارنالارىندا جۇمىس ىستەيتىن بەلگىلى جۋرناليستەر الدىندا ءسوز سويلەدى.
مەديافورۋمدا ۋكراينانى ايگىلى جۋرناليست دميتري گوردون تانىستىردى. اليەۆ وعان جاۋاپ بەرۋ كەزىندە ۋكرايناداعى جاعداي مەن ارمەنيامەن ناگورنىي قاراباح ءۇشىن بولعان قاقتىعىستى سالىستىرىپ ءوتتى.
پرەزيدەنت ءوز سوزىندە ازەربايجاندىقتار وككۋپاتسيالانعان اۋماقتاردى قايتارىپ العانىن ايتىپ، ۋكراين حالقىنا دا ءدال سولاي جاساۋعا كەڭەس بەردى. بۇل پىكىرىن ول III شۋشا جاھاندىق مەديافورۋمىندا دميتري گوردون قويعان سۇراققا جاۋاپ رەتىندە ءبىلدىردى.
«بۇرىن مەن ۋكراينا وكىلى قويعان وسىنداي سۇراققا ءبىر شارا بارىسىندا جاۋاپ بەرگەن ەدىم. سول كەزدەگى جاۋابىم قازىر دە وزگەرمەيدى. بۇل، مەنىڭشە، ۋكراين حالقىنىڭ ءۇمىت-تىلەكتەرىمەن ۇندەسەدى: وككۋپاتسيامەن ەشقاشان كەلىسپەۋ. مەنىڭ ەڭ باستى كەڭەسىم – وسى. ءبىز دە سولاي جاسادىق»، – دەدى يلحام اليەۆ.
سونداي-اق، ول ناگورنىي قاراباحتىڭ ۇزاق ۋاقىت ارميان اسكەرى باقىلاۋىندا بولعانىن، بىراق ازەربايجان ونى قايتارىپ العانىن ەسكە سالدى. اليەۆتىڭ ايتۋىنشا، بۇۇ قاۋىپسىزدىك كەڭەسى بۇل ماسەلە بويىنشا ارمەنيا اسكەرىن اۋماقتان شىعارۋ تۋرالى ءتورت قارار قابىلداعانىمەن، ولاردىڭ بىردە-ءبىرى ورىندالماعان.
