تۇركيا قورعانىس مينيسترلىگى ازەربايجاننان تۇركياعا ۇشىپ كەلە جاتقان C-130 اسكەري تاسىمالداۋ ۇشاعى گرۋزيا مەن ازەربايجان شەكاراسىندا قۇلاعانىن مالىمدەدى، دەپ حابارلايدى "ادىرنا" ۇلتتىق پورتالى.
مينيسترلىك مالىمەتىنشە، ىزدەستىرۋ-قۇتقارۋ جۇمىستارى ازەربايجان جانە گرۋزيا بيلىك ورگاندارىمەن بىرلەسىپ جۇرگىزىلۋدە.
تۇركيا قورعانىس مينيسترلىگىنىڭ Twitter-دەگى رەسمي پاراقشاسىندا:
"ازەربايجاننان تۇركياعا ۇشىپ كەلە جاتقان C-130 اسكەري جۇك ۇشاعىمىز گرۋزيا - ازەربايجان شەكاراسىندا قۇلادى. ىزدەستىرۋ-قۇتقارۋ جۇمىستارىنا ازەربايجان مەن گرۋزيا بيلىك ورگاندارى قاتىسۋدا", - دەپ جازىلعان.
باق-تا تاراعان مالىمەتكە سايكەس، ۇشاق گرۋزيانىڭ مەملەكەتتىك شەكاراسىنان شامامەن بەس شاقىرىم جەردە، سيگناحي مۋنيتسيپاليتەتىندە قۇلاعان.
Report اگەنتتىگى ۇشاقتىڭ ازەربايجاننان تۇركياعا ۇشىپ بارا جاتقان بولۋى مۇمكىن ەكەنىن حابارلاعان.
گرۋزيا ءىىم حابارلاماسىندا:
"وقيعا قىلمىستىق كودەكستىڭ 275-بابىنىڭ 4-تارماعى بويىنشا تەرگەلىپ جاتىر (اۋە قاتىناسىنداعى قاۋىپسىزدىك ەرەجەلەرىن نەمەسە ۇشاق ەكسپلۋاتاتسياسىن بۇزۋ، سالدارىنان ادامداردىڭ ابايسىزدا ءولىمى). ءىىم كەزەڭ-كەزەڭىمەن قوعامعا تولىق اقپارات بەرەتىن بولادى", - دەلىندى.
قازىرگى ۋاقىتتا ۇشاقتاعى ادامداردىڭ قاۋىپسىزدىگى جانە قازا بولعاندار تۋرالى اقپارات جاريالانباعان.
