فوتو: globallookpress
باگام ارالدارىندا جەڭىل موتورلى ۇشاق اپاتقا ۇشىراپ، سالدارىنان 10 ادام – توعىز جولاۋشى مەن ۇشقىش قازا تاپتى. بۇل تۋرالى BBC جازدى، دەپ حابارلايدى “ادىرنا”.
Flamingo Air اۋە كومپانياسىنا تيەسىلى Cessna 402 ۇشاعى ناسساۋ ماڭىنداعى ليندەن پيندلينگ اتىنداعى حالىقارالىق اۋەجايدان سان-اندروس اۋەجايىنا باعىت العان. اۋە وقيعالارىن تەرگەۋ باسقارماسىنىڭ مالىمەتىنشە، قونۋعا از ۋاقىت قالعاندا ۇشاقتا تەحنيكالىق اقاۋ تۋىنداپ، ول بۇتالى جەرگە قۇلاعان.
اپات باگام ارالدارىنىڭ تاۋەلسىزدىگىنىڭ 53 جىلدىعى تويلانىپ جاتقان كۇنى بولدى. ەلدىڭ پرەمەر-ءمينيسترى فيليپ دەۆيس بۇل وقيعانى ۇلتتىق تراگەديا دەپ اتادى.
العاشىندا اپاتتان ءبىر ادامنىڭ امان قالعانى حابارلانعان ەدى. الايدا كەيىن بيلىك وكىلدەرى ونىڭ اۋرۋحانادا كوز جۇمعانىن راستادى.
وقيعادان كەيىن ازاماتتىق اۆياتسيا مينيسترلىگى قاۋىپسىزدىك ماقساتىندا Flamingo Air اۋە كومپانياسىنىڭ اۋە تاسىمالىن جۇزەگە اسىرۋ سەرتيفيكاتىنىڭ كۇشىن ۋاقىتشا توقتاتتى. ۆەدومستۆو بۇل شەشىمنىڭ جازالاۋ شاراسى ەمەس، الدىن الۋ ماقساتىندا قابىلدانعانىن مالىمدەدى.
اۆياتسيا ءمينيسترى دجوبەت كولبي-دەۆيستىڭ ايتۋىنشا، سول كۇنى Flamingo Air كومپانياسىنىڭ تاعى ءبىر ۇشاعى تەحنيكالىق اقاۋعا بايلانىستى ناسساۋعا كەرى ورالۋعا ءماجبۇر بولعان. جولاۋشىلار تۇسىرىلگەننەن كەيىن اۋە كەمەسىنىڭ بورتىندا ءورت شىققان.
ءوز كەزەگىندە Flamingo Air كومپانياسى وقيعاعا قاتىستى بارلىق قاجەتتى اقپاراتتى جيناپ جاتقانىن جانە تەرگەۋ جۇرگىزىپ جاتقان قۇزىرلى ورگاندارمەن تولىق ىنتىماقتاستىق ورناتىپ وتىرعانىن مالىمدەدى.
