قارا تەڭىزدە شەتەلدىك TEDY جۇك كەمەسىنە جاسالعان درون شابۋىلى سالدارىنان ازەربايجاننىڭ ەكى ازاماتى قازا تاپتى، دەپ حابارلايدى "ادىرنا" ءتىلشىسى Report-قا سىلتەپ.
تاعى ەكى ادام جارالاندى.
ازەربايجان ءسىم مالىمەتىنشە، وقيعا 9 قىركۇيەكتە بولعان. كەمە ەكيپاجىنىڭ قۇرامىندا ازەربايجان ازاماتتارى بولعان.
شابۋىل سالدارىنان جارالانعاندار ۋكراينانىڭ چەرنومورسك قالاسىنداعى قالالىق اۋرۋحاناعا جەتكىزىلگەن.
قازىر ازەربايجان سىرتقى ىستەر مينيسترلىگى ەلدىڭ ديپلوماتيالىق وكىلدىكتەرى مەن ءتيىستى مەملەكەتتەردىڭ قۇزىرلى ورگاندارىمەن بىرلەسىپ جۇمىس جۇرگىزىپ جاتىر.
جارالانعان ازاماتتار مەديتسينالىق تەكسەرۋ مەن ەم قابىلداعاننان كەيىن ەلگە قايتارىلادى دەپ جوسپارلانعان. سونىمەن قاتار مينيسترلىك ولارعا قاجەتتى كونسۋلدىق كومەك كورسەتىپ، قازا تاپقانداردىڭ دەنەلەرىن ەلگە جەتكىزۋگە قاتىستى راسىمدەردى ۇيىمداستىرۋ شارالارىن قولعا العان.
ۆەدومستۆو ازەربايجان ازاماتتارىن اسكەري قيمىلدار ءجۇرىپ جاتقان نەمەسە قاۋىپسىزدىك جاعدايى تۇراقسىز وڭىرلەرگە بارۋدان، سونداي-اق مۇنداي اۋماقتاردا جۇمىس ىستەۋدەن جانە وسى باعىتتار بويىنشا قاتىنايتىن كولىك قۇرالدارىندا، سونىڭ ىشىندە كەمەلەردە قىزمەت اتقارۋدان باس تارتۋعا شاقىردى.
