دۇيسەنبىگە قاراعان ءتۇنى رەسەي اسكەرى كيەۆكە جانە ۋكرايناداعى باسقا دا قالالارعا جاپپاي شابۋىل جاسادى. ۋكراينا پرەزيدەنتى ۆلاديمير زەلەنسكي ەكى ادامنىڭ قازا تاپقانىن مالىمدەدى، دەپ حابارلايدى «ادىرنا» ءتىلشىسى.
يۆانو-فرانكوۆسك قالاسىنىڭ بيلىگى بۇل سوعىس باستالعالى بەرگى ەڭ اۋقىمدى شابۋىل بولعانىن ايتتى.
"رەسەيدىڭ سوققىلارى ادامزاتقا قارسى باعىتتالعان. كيەۆتە بالاباقشا، تۇرعىن ۇيلەر مەن باسقا دا ازاماتتىق ينفراقۇرىلىمدار ورتەندى. حاركوۆتە، يۆانو-فرانكوۆسك قالاسىندا جانە وسى وبلىستا قاراپايىم تۇرعىن ۇيلەر قيرادى. 15 ادام جاراقات الدى، ولاردىڭ ىشىندە ەڭ كىشكەنتايى – 12 جاستا. بارلىعىنا كومەك كورسەتىلىپ جاتىر. ەكى ادام شابۋىل كەزىندە قازا تاپتى", — دەدى ۋكراينا پرەزيدەنتى Telegram-ارناسىندا.
ۋكراينا اۋە كۇشتەرىنىڭ مالىمەتىنشە، دۇيسەنبىگە قاراعان ءتۇنى رەسەي 450 اۋە شابۋىلى قۇرالىن قولدانعان. ولاردىڭ ىشىندە 426 ۇشقىشسىز ۇشۋ اپپاراتى بەس «كينجال» اەروبالليستيكالىق زىمىرانى، ءتورت «كاليبر» قاناتتى زىمىرانى، 14 ح-101 قاناتتى زىمىرانى جانە ءبىر «يسكاندەر» قاناتتى زىمىرانى بار.
رەسەي تاراپى بۇل شابۋىلعا قاتىستى تۇسىنىكتەمە بەرگەن جوق. ۋكراينا بيلىگىنىڭ ايتۋىنشا، شابۋىلدىڭ نەگىزگى نىساندارى كيەۆ، يۆانو-فرانكوۆسك جانە حاركوۆ بولعان.
ەسكە سالايىق، ۋكراينا استاناسىنا بۇنداي اۋقىمدى شابۋىل سوڭعى رەت 4 شىلدەدە جاسالعان بولاتىن.
