ازوۆ تەڭىزىندە جۇك كەمەلەرىنە جاسالعان شابۋىلدان بەس ازەربايجان ازاماتى قازا تاپتى، دەپ حابارلايدى “ادىرنا” ۇلتتىق پورتالى.
تاعى ۇشەۋى جاراقات العان.
ريا نوۆوستي اگەنتتىگىنىڭ حابارلاۋىنشا، شابۋىلعا تۇركيادان روستوۆ-نا-دونۋعا استىق تيەۋگە باعىت العان «ناترا» جانە «تسيركون» جۇك كەمەلەرى ۇشىراعان. وقيعا تاگانروگ ماڭىندا 5 ماۋسىمعا قاراعان ءتۇنى بولعان.
ازەربايجان ءسىم مالىمەتىنشە، كەمەلەردە ەلدىڭ 25 ازاماتى بولعان. رەسەي تاراپىنىڭ اقپاراتىنا سايكەس، شابۋىل ناتيجەسىندە بەس ادام كوز جۇمىپ، ءۇش ادام جارالانعان. زارداپ شەككەندەر رەسەيدىڭ ەيسك قالاسىنداعى اۋرۋحاناعا جەتكىزىلگەن.
ۆەدومستۆو قازىرگى ۋاقىتتا مەملەكەتتىك ورگاندارمەن، ديپلوماتيالىق وكىلدىكتەرمەن جانە ءتيىستى مەكەمەلەرمەن بىرلەسىپ جۇمىس جۇرگىزىپ جاتقانىن حابارلادى. رەسەيدەگى ازەربايجان ەلشىلىگىنىڭ قىزمەتكەرلەرى وقيعا ورنىنا اتتانعان. قازا تاپقاندار مەن زارداپ شەككەندەردىڭ جاعدايى، ولاردىڭ ەلگە قايتارىلۋى مەن كونسۋلدىق قولداۋ كورسەتۋ ماسەلەلەرى ەرەكشە باقىلاۋعا الىنعان.
