ىستانبۇلدا ءوتىپ جاتقان IDEF 2025 – 17-ءشى حالىقارالىق قورعانىس ونەركاسىبى جارمەڭكەسىندە تۇركيا ءوزىنىڭ العاشقى گيپەردىبىستى بالليستيكالىق زىمىرانى – TAYFUN BLOK-4-ءتى رەسمي تۇردە تانىستىردى، دەپ حابارلايدى "ادىرنا" ۇلتتىق پورتالى.
زىمىراندى ROKETSAN كومپانياسى ازىرلەگەن. ونىڭ ەرەكشەلىگى – ۇشۋ قاشىقتىعى 3 000 شاقىرىمعا دەيىن جەتىپ، جەدەل-ستراتەگيالىق نىسانداردى، كوماندالىق پۋنكتتەردى، قويمالاردى، اەرودرومداردى جانە اۋە قورعانىس جۇيەلەرىن جويۋعا ارنالعان.
Roketsan باس ديرەكتورى مۋرات يكيندجي بۇل ءونىمنىڭ تۇركيانىڭ بالليستيكالىق زىمىران تەحنولوگياسىنداعى جەتىستىگىن ايعاقتايتىنىن ايتتى.
“TAYFUN BLOK-4 – گيپەرسونيكالىق جىلدامدىققا يە، ۇزىندىعى 10 مەتر، سالماعى 7 200 كگ بولاتىن، ەڭ ۇلكەن تەجەۋ اسەرى بار TAYFUN وتباسىنىڭ وكىلى. بۇل جوبا وندىرىستە جاپپاي قولعا الىنىپ جاتىر”، – دەدى ول.
تۇركيا قۇرلىق اسكەرلەرىنىڭ قولباسشىسى، گەنەرال سەلچۋك بايراكتاروعلى بۇل جۇيەنىڭ ەل قورعانىسى ءۇشىن ماڭىزىن اتاپ ءوتتى.
ء“بىز بۇل زىمىراندى بيىلعى جىلدىڭ سوڭىنا دەيىن اسكەري تەحنيكا قۇرامىنا ەنگىزەمىز دەپ جوسپارلاپ وتىرمىز. بۇل تۇرىك قارۋلى كۇشتەرى ءۇشىن بالليستيكالىق زىمىرانمەن العاشقى بايلانىس بولادى. جاڭا جۇيەنىڭ جىلدامدىعى مەن قاشىقتىعى ونىڭ باستى ستراتەگيالىق تەجەۋ قۇرالدارىنىڭ بىرىنە اينالۋىنا مۇمكىندىك بەرەدى”، – دەدى گەنەرال.
TAYFUN BLOK-4 تۇركيانىڭ قورعانىس ونەركاسىبىندەگى جاڭا كەزەڭگە قادام باسقانىن جانە زىمىران-عارىشتىق تەحنولوگيالار سالاسىندا باسەكەگە قابىلەتتى ەلگە اينالىپ كەلە جاتقانىن كورسەتەدى.
