بۇگىن، 24 شىلدە كۇنى، جاڭاوزەن قالاسىندا انگار تيپىندەگى كوپفۋنكتسيونالدى مۇز ايدىنىنىڭ سالتاناتتى اشىلۋ ءراسىمى ءوتتى.
يگى شاراعا ماڭعىستاۋ وبلىسىنىڭ اكىمى نۇرداۋلەت قيلىباي قاتىسىپ، جەرگىلىكتى تۇرعىنداردى تاريحي وقيعامەن قۇتتىقتادى.
- مەملەكەت باسشىسى قاسىم-جومارت توقاەۆ بالالاردى سپورتقا باۋلۋعا ءاردايىم ەرەكشە ءمان بەرىپ كەلەدى. مىنە سونىڭ ايقىن دالەلى - بۇگىنگى ءىس-شارا. جاڭا مۇز ايدىنىندا قىسقى سپورت تۇرلەرىن دامىتۋ ماقساتىندا مانەرلەپ سىرعاناۋدان سپورت شەبەرى الەنا پونكراتوۆا ارنايى سانكت-پەتەربۋرگتەن شاقىرتىلىپ، وسى كەشەندە تۇراقتى جاتتىقتىرۋ ءۇشىن كەلىسىمشارتقا وتىردى. ەندى اتا-انالارعا، جاتتىقتىرۋشىلار مەن سپورت ۇيىمدارىنا زور سەنىم ارتىلىپ وتىر. جاس سپورتشىلارىمىز كاسىبي جاتتىقتىرۋشىمەن بىرگە جاڭا بيىكتەردى باعىندىرىپ، جارقىن جەڭىستەرگە جەتەتىنىنە سەنىمىمىز مول. كوك تۋىمىزدى كوككە كوتەرەتىن ناعىز ساڭلاقتار وسى مۇز ايدىنىنان شىعا بەرسىن،- دەدى نۇرداۋلەت قيلىباي.
جاڭا كەشەننىڭ قۇرىلىسى 2023 جىلى باستالىپ، 2024 جىلى تولىق اياقتالدى. جوبا جەرگىلىكتى بيۋدجەت قاراجاتى ەسەبىنەن جۇزەگە اسىرىلدى.
نىساننىڭ جالپى اۋماعى - 1100 شارشى مەتر، ونىڭ ىشىندە مۇز الاڭى 960 شارشى مەتردى قۇرايدى. مۇز ايدىنى ءبىر مەزەتتە 500 ادامدى قابىلداي الادى. سپورتتىق كەشەندە ۇلدار مەن قىزدارعا ارنالعان جۋىنۋ جانە كيىم اۋىستىرۋ بولمەلەرى، جاتتىقتىرۋشىلار مەن مەديتسينالىق قىزمەتكەرلەرگە ارنالعان كابينەتتەر، سونداي-اق اكىمشىلىك بولمەلەر قاراستىرىلعان.
كەشەننىڭ ەكىنشى قاباتىندا بالالار مەن جاسوسپىرىمدەر سپورت مەكتەبىنىڭ تاربيەلەنۋشىلەرىنە ارنالعان زاماناۋي جاتتىعۋ زالى ورنالاسقان. مۇندا 10-18 جاس ارالىعىنداعى العاشقى دايارلىق توپتارى مەن جاس سپورتشىلار كاسىبي جاتتىقتىرۋشىلاردىڭ جەتەكشىلىگىمەن جاتتىعاتىن بولادى.
الداعى ۋاقىتتا نىساندا حوككەي، شورت-ترەك، مانەرلەپ سىرعاناۋ جانە كەرلينگ سىندى وليمپيادالىق سپورت تۇرلەرىنەن تەگىن ۇيىرمەلەر جۇمىسىن باستايدى.
