Bügın, 24 şılde künı, Jaŋaözen qalasynda angar tipındegı köpfunksionaldy mūz aidynynyŋ saltanatty aşylu räsımı öttı.
İgı şaraǧa Maŋǧystau oblysynyŋ äkımı Nūrdäulet Qilybai qatysyp, jergılıktı tūrǧyndardy tarihi oqiǧamen qūttyqtady.
- Memleket basşysy Qasym-Jomart Toqaev balalardy sportqa bauluǧa ärdaiym erekşe män berıp keledı. Mıne sonyŋ aiqyn dälelı - bügıngı ıs-şara. Jaŋa mūz aidynynda qysqy sport türlerın damytu maqsatynda mänerlep syrǧanaudan sport şeberı Alena Ponkratova arnaiy Sankt-Peterburgten şaqyrtylyp, osy keşende tūraqty jattyqtyru üşın kelısımşartqa otyrdy. Endı ata-analarǧa, jattyqtyruşylar men sport ūiymdaryna zor senım artylyp otyr. Jas sportşylarymyz käsıbi jattyqtyruşymen bırge jaŋa biıkterdı baǧyndyryp, jarqyn jeŋısterge jetetınıne senımımız mol. Kök Tuymyzdy kökke köteretın naǧyz saŋlaqtar osy mūz aidynynan şyǧa bersın,- dedı Nūrdäulet Qilybai.
Jaŋa keşennıŋ qūrylysy 2023 jyly bastalyp, 2024 jyly tolyq aiaqtaldy. Joba jergılıktı biudjet qarajaty esebınen jüzege asyryldy.
Nysannyŋ jalpy aumaǧy - 1100 şarşy metr, onyŋ ışınde mūz alaŋy 960 şarşy metrdı qūraidy. Mūz aidyny bır mezette 500 adamdy qabyldai alady. Sporttyq keşende ūldar men qyzdarǧa arnalǧan juynu jäne kiım auystyru bölmelerı, jattyqtyruşylar men medisinalyq qyzmetkerlerge arnalǧan kabinetter, sondai-aq äkımşılık bölmeler qarastyrylǧan.
Keşennıŋ ekınşı qabatynda balalar men jasöspırımder sport mektebınıŋ tärbielenuşılerıne arnalǧan zamanaui jattyǧu zaly ornalasqan. Mūnda 10-18 jas aralyǧyndaǧy alǧaşqy daiarlyq toptary men jas sportşylar käsıbi jattyqtyruşylardyŋ jetekşılıgımen jattyǧatyn bolady.
Aldaǧy uaqytta nysanda hokkei, şort-trek, mänerlep syrǧanau jäne kerling syndy olimpiadalyq sport türlerınen tegın üiırmeler jūmysyn bastaidy.
