23-24 شىلدە كۇندەرى ءى رەسپۋبليكالىق «قوبىزىم – قوڭىرىم» قوبىزشىلار بايقاۋى ءوتتى. بۇل بايقاۋدىڭ ۇلىتاۋ وبلىسى، جەزقازعان قالاسىندا ۇيىمداستىرىلۋىنىڭ وزىندىك سەبەبى دە بار. قويلىباي باقسى – وسى ۇلىتاۋ وڭىرىندە تۋىپ-وسكەن، قازاق حالقىنىڭ رۋحاني مادەنيەتىنە زور ۇلەس قوسقان تاريحي تۇلعا. قورقىتتىڭ قوبىزىن، سارىنىن العاش ميراس تۇتقان ونەر يەسى دە وسى قويلىباي بولعان.
باقسىلىعىمەن دە، قوبىزشىلىعىمەن دە اتى اڭىزعا اينالعان قويلىباي اۋليە اتىنداعى العاشقى قوبىزشىلار بايقاۋىن وتكىزۋگە ۇلىتاۋ وبلىسىنىڭ اكىمدىگى قولداۋ بىلدىرسە، بايقاۋدى وبلىستىق مادەنيەت، تىلدەردى دامىتۋ جانە ارحيۆ ءىسى باسقارماسى مەن وبلىستىق مادەني-ساۋىق جانە شىعارماشىلىق عىلىمي-ادىستەمەلىك ورتالىعى ۇيىمداستىرىپ وتكىزدى.
س.قوجامقۇلوۆ اتىنداعى قازاق مۋزىكالىق دراما تەاترى قوبىزدىڭ تىلسىم ءۇنىن تىڭداۋعا قۇشتار كوپشىلىكتى ەكى كۇن بويى وزىنە تارتىپ، وزىندە تۇسادى. رەسپۋبليكالىق دەڭگەيدە وتكىزىلىپ وتىرعان قوبىزشىلار بايقاۋىنىڭ باستى ماقساتى قويلىباي اۋليەنىڭ ەمشىلىگىمەن قاتار، قوبىزشى بولعانىن كوپكە تانىتۋ، ناسيحاتتاۋ بولدى. سونىمەن قاتار، جاس ۇرپاقتى قوبىز ونەرىنە باۋلۋ، حالىقتىڭ كونەدەن كەلە جاتقان ونەرىن ۇرپاق جادىندا جاڭعىرتۋ بولىپ تابىلادى. بايقاۋ بارىسىندا كورەرمەن كوپشىلىك ونى ۇيىمداستىرۋشىلاردىڭ ۇلتتىق اسپاپتار مەكتەبىنىڭ ءداستۇرىن ساقتاپ، كۇيدىڭ ۇمىتىلىپ بارا جاتقان ورىنداۋشىلىق ءداستۇرىن قايتا تۇلەتۋلەرىنە كۋا بولىستى.
بايقاۋ سونىمەن بىرگە، ارينە، قوبىزدا تالانتتى ورىنداۋشىلاردى انىقتاپ، ولاردىڭ شەبەرلىكتەرىن شىڭداۋعا مۇمكىندىك جاسادى.
بايقاۋعا ەلىمىزدىڭ تۇپكىر-تۇپكىرىنەن 12 ۇمىتكەر قاتىستى.
باس جۇلدە يەگەرى اسەن سمايل- تالدىقورعان قالاسى.
ءى ورىن يەگەرى ازباەۆ ادلەت -الماتى قالاسى.
ءىى ورىن يەگەرى قۇرمانبەك ولجاس – استانا قالاسى.
ءىىى ورىن يەگەرلەرى تورەحانوۆ ەراسىل-جەتىسۋ وبلىسى جانە جەتپىسباەۆا اياۋلىم- قاراعاندى وبلىسىنان.
ديپلومانتتار: قىدىرمۇرات اسەل، سايلاۋوۆا دانا، ەرجان جانايىم - الماتى قالاسىنان، مايدانوۆا سامال-استانا قالاسىنان.
ارنايى جۇلدەلەر: قورقىت اتىنداعى جۇلدە يەگەرى بولات ارايلىم- الماتى قالاسى، ىقىلاس اتىنداعى جۇلدە يەگەرى التىنبەكوۆا گاۋھار-قاراعاندى قالاسى، قويلىباي اۋليە اتىنداعى جۇلدە يەگەرى قابىل مەدەت-ۇلىتاۋ وبلىسى.
