قازاقستاندىق وپەرا ءانشىسى ايگەرىم التىنبەك XI حالىقارالىق CLIP 2025 وپەرا بايقاۋىندا جەڭىسكە جەتتى. ونەرپاز ءبىرىنشى ورىننان بولەك، بايقاۋدىڭ نەگىزگى نوميناتسيالارىندا ۇزدىك اتانىپ، ءابسوليۋتتى جەڭىمپاز بولدى. بۇل تۋرالى بۇگىن، 28 شىلدەدە مادەنيەت جانە اقپارات مينيسترلىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
سونداي-اق وتانداسىمىز كورەرمەن كوزايىمى جۇلدەسىن، «ۇزدىك ايەل داۋىسى» ماراپاتىن جانە مۋزىكا سىنشىسى، ارت-ديرەكتور ءارى پەداگوگ كارلو مايەردىڭ ارنايى جۇلدەسىن يەلەندى.
بۇل – ەل مادەنيەتىندەگى تاريحي جەڭىس. بايقاۋدا العاش رەت ورتالىق ازيا وكىلى وسىنداي جەتىستىككە جەتىپ، كوشباسشىلار قاتارىنان كورىندى.
«بايقاۋ تاريحىندا ءبىرىنشى رەت ايگەرىم التىنبەك سايىستىڭ باسىنان بارلىق قازىلار القاسىنىڭ رەيتينگىندە ءبىرىنشى تۇردى. بۇل – وتە سيرەك كەزدەسەتىن جاعداي. بۇل كورەرمەننىڭ دە تاڭداۋى دۇرىس بولعانىن دالەلدەيدى»، – دەدى قازىلار القاسىنىڭ توراعاسى دومينيك مەيەر.
بيىلعى بايقاۋعا الەمنىڭ تۇكپىر-تۇكپىرىنەن 200-گە جۋىق ءوتىنىم تۇسكەن. بىراق فينالعا نەبارى 10 ورىنداۋشى ءوتتى. ولار پورتوفينو قالاسىنىڭ ورتالىق الاڭىندا Teatro Carlo Felice وركەسترىنىڭ سۇيەمەلدەۋىمەن وتكەن گالا-كونتسەرتتە ونەر كورسەتتى.
«ۇزدىك ايەل داۋىسى» جۇلدەسىن ايگەرىمگە چيليدەگى يبانەس-اتكينسون قورى تابىستادى. بۇل قور – الەم بويىنشا جاس، دارىندى ۆوكاليستەردى ىزدەپ، قولداۋمەن اينالىساتىن حالىقارالىق ۇيىم. قور جەتەكشى تەاترلارمەن ارىپتەستىك ورناتقان جانە سانتياگوداعى وپەرا تەاترىمەن بىرلەسكەن جاستار باعدارلاماسىن جۇزەگە اسىرادى.
ايگەرىم – بۇل قوردىڭ وڭتۇستىك امەريكا كونتينەنتىندەگى قولداۋىنا يە بولعان العاشقى ەۋروپالىق ەمەس ءانشى. وعان كاسىبي جانە بولاشاق ىنتىماقتاستىق بويىنشا ۇسىنىس جاسالدى. بۇل ۇسىنىس وتاندىق ونەرپازعا ەۋروپادان تىس جەرلەردە دە حالىقارالىق مانسابىن كەڭەيتۋگە مۇمكىندىك بەرەدى.
ەسكە سالا كەتەيىك، Concorso Lirico Internazionale di Portofino (CLIP) – جىل سايىن يتاليانىڭ پورتوفينو قالاسىندا وتەتىن، الەمدەگى ەڭ بەدەلدى ۆوكالدىق بايقاۋلاردىڭ ءبىرى. كونكۋرستىڭ قازىلار القاسى قۇرامىندا ەۋروپانىڭ جەتەكشى وپەرا تەاترلارى ۆەنا وپەراسى، لا سكالا، گلايندبورن، مەتروپوليتەن جانە ەليسەي الاڭىنداعى تەاتردىڭ رەجيسسەرلەرى مەن ديرەكتورلارى بار.
