ەلىمىزدە بيىل اباي اتىنداعى مەملەكەتتىك سىيلىق بەرىلمەيدى، دەپ حابارلايدى "ادىرنا" ۇلتتىق پورتالى اقورداعا سىلتەپ.
ۆيتسە-پرەزيدەنت ەرلان قاريننىڭ توراعالىعىمەن 2026 جىلعى اباي اتىنداعى ادەبيەت پەن ونەر سالاسىنداعى مەملەكەتتىك سىيلىقتى بەرۋ جونىندەگى كوميسسيانىڭ قورىتىندى وتىرىسى ءوتتى.
جيىندا كوميسسيا مۇشەلەرى ادەبيەت، تەاتر، مۋزىكا جانە بەينەلەۋ ونەرى باعىتتارى بويىنشا كونكۋرستىڭ ەكىنشى كەزەڭىنە وتكەن جەتى تۋىندىنى قارادى.
مادەنيەت جانە اقپارات ءمينيسترى ارمان قىرىقباەۆ ۇسىنىلعان ەڭبەكتەردىڭ قوعامدا تالقىلانۋ بارىسى تۋرالى باياندادى.
داۋىس بەرۋ ناتيجەسىندە كوميسسيا مۇشەلەرى بيىلعى مەملەكەتتىك سىيلىققا ۇسىنىلعان تۋىندىلاردىڭ ەشقايسىسىنا قاتىستى ورتاق شەشىمگە كەلە المادى.
سونىمەن قاتار وتىرىستا كوميسسيا جۇمىسىن جەتىلدىرۋ ماسەلەلەرى تالقىلاندى. اتاپ ايتقاندا، شىعارمالاردى باعالاۋ تالاپتارىن قايتا قاراۋ، ساراپتامالىق سۇيەمەلدەۋ تەتىكتەرىن جەتىلدىرۋ جانە كونكۋرستىق ىرىكتەۋ راسىمدەرىن جۇيەلەۋ جونىندە ۇسىنىستار ايتىلدى.
وسىلايشا، 2026 جىلى اباي اتىنداعى ادەبيەت پەن ونەر سالاسىنداعى مەملەكەتتىك سىيلىق يەگەرلەرى انىقتالمادى.
ايتا كەتەيىك، 10 ماۋسىمدا كوميسسيا مۇشەلەرى ادەبيەت جانە ونەر سالالارى بويىنشا مەملەكەتتىك سىيلىققا ۇسىنىلعان 32 جۇمىستى قاراعان. داۋىس بەرۋ قورىتىندىسى بويىنشا كوميسسيا كونكۋرستىق ىرىكتەۋدىڭ كەلەسى كەزەڭىنە وتكەن ۇمىتكەرلەردى انىقتاعان دا ەدى.
اباي اتىنداعى سىيلىق ەكى جىلدا ءبىر رەت بەرىلەدى.
2024 جىلى مەملەكەتتىك سىيلىق اقىن سۆەتقالي نۇرجانعا «كوكىرەگىم كونە كىتاپ» جىر كىتابى، جازۋشى قۇلبەك ەرگوبەككە «ادامنىڭ ءبىر قىزىعى بالا دەگەن» كىتابى، اۆتورلىق ۇجىم ءالىباي باپانوۆ پەن ساۋلە باپانوۆاعا «كوشپەندى فرەسكالار» كيىزدەن باستىرىلعان پاننولارى توپتاماسى مەن «الەم ورنەكتەرى» گوبەلەندەر توپتاماسى، سۋرەتشى جانۇزاق مۇساپىرگە «بالالىقتان دانالىققا جول» توپتامالار جيناعى ءۇشىن بەرىلگەن.
