مويىنقۇم اۋىلىندا اتىس بولىپ، ءتورت ادام اۋىر جاراقات العان. دارىگەرلەر مالىمدەمە جاسادى، دەپ حابارلايدى "ادىرنا" ۇلتتىق پورتالى.
جامبىل وبلىستىق دەنساۋلىق ساقتاۋ باسقارماسىنىڭ مالىمەتىنشە، اۋرۋحانانىڭ قابىلداۋ بولىمىنە ءتۇرلى جاراقات العان ءتورت ادام جەتكىزىلگەن.
"28 جاستاعى ناۋقاستىڭ باسى، كەۋدە قۋىسى جانە وڭ بىلەگىندە رەزەڭكە وقتان جاراقات بار. سونىمەن قاتار وڭ جانە سول جامباسىندا بىرنەشە تەسىلگەن جارا بايقالعان. ناۋقاس كوپ قان جوعالتىپ، 2-دارەجەلى تراۆماتيكالىق شوك العان. قازىرگى جاعدايى اۋىر", – دەدى وبلىستىق دەنساۋلىق ساقتاۋ باسقارماسى.
دارىگەرلەردىڭ ايتۋىنشا، اۋرۋحاناعا تۇسكەن تاعى ءبىر – 26 جاستاعى ەر ادام دا اۋىر حالدە. ونىڭ سول جاق بىلەگى، جامباسى جانە وڭ قولى جارالانعان. قازىرگى كەزدە جاعدايى تۇراقسىز.
جامبىل وبلىستىق پوليتسيا دەپارتامەنتىنىڭ مالىمەتىنشە، بۇل فاكتى بويىنشا قر قىلمىستىق كودەكسىنىڭ 24-بابى 3-بولىگى جانە 99-بابى 2-بولىگى بويىنشا (ادام ولتىرۋگە وقتالۋ) قىلمىستىق ءىس قوزعالعان.
"جاراقاتتار تراۆماتيكالىق قارۋدان كەلگەن. قازىرگى ۋاقىتتا كۇدىكتىلەردى انىقتاۋ جانە ۇستاۋ باعىتىندا جەدەل ىزدەستىرۋ ءىس-شارالارى جۇرگىزىلۋدە", – دەپ مالىمدەدى پوليتسيا وكىلدەرى.
وقيعانىڭ ءمان-جايى انىقتالىپ جاتىر.
ايتا كەتەيىك، باق بەتتەرىندە تارالعان اقپاراتقا سايكەس، وقيعا 30 شىلدە كۇنى كەشكى ساعات 21:10 شاماسىندا بولعان.
