جۋرناليست كاكەن قامزين الەۋمەتتىك جەلىدەگى جازباسىندا الاياقتاردىڭ ارباۋىنا قالاي تۇسكەنى تۋرالى جازدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، 12 ماۋسىم كۇنى ءوزىن قالالىق ەنەرگوجۇيە قىزمەتكەرى رەتىندە تانىستىرعان ءبىر ايەل حابارلاسىپ، ۇيدەگى ەلەكتر ەسەپتەگىشتىڭ ەسكىرگەنىن ايتىپ، جەكە مالىمەتتەرىن سۇراتقان.
كەيىن «قارجى باقىلاۋ دەپارتامەنتىنەن»، ارتىنان ءوزىن «ۇقك مايورىمىن» دەپ تانىستىرعان ادام بايلانىسقا شىعىپ، مالىمەتتەرى الاياقتاردىڭ قولىنا تۇسكەنىن ايتىپ، ارنايى وپەراتسياعا كومەكتەسۋگە مىندەتتى ەكەنىن ەسكەرتكەن.
وسى ساتتەن باستاپ كاكەن قامزين بىرنەشە ادامنىڭ باقىلاۋىندا قالىپ، ولاردىڭ ايتقانىن مۇلتىكسىز ورىنداي باستاعان. «بالكىم، تەلەفون ارقىلى گيپنوز دا قولدانىلدى»، – دەيدى ول. سولاردىڭ ايتۋىمەن ول ءوز جيناعىن «ۇلتتىق بانكتىڭ ەسەبىنە اۋدارۋ كەرەك» دەپ بىرنەشە تەرمينال ارقىلى اقشاسىن جىبەرگەن. كەيىن حالىق بانكتەن 5 ميلليون تەڭگە شەشىپ، بەلگىسىز ءبىر كۋرەرگە بەرگەن.
الاياقتار مۇنىمەن شەكتەلمەي، كاكەن قامزينگە «دەرەكتەردى جاڭالاۋ ءۇشىن ءۇيىڭىزدى نارىق باعاسىنان تومەن باعاعا ساتۋ قاجەت» دەپ، 26 ماۋسىمدا 31 ميلليون تەڭگەگە پاتەرىن ساتقان. ولار ۇيگە جالعان حابارلاندىرۋ ورنالاستىرىپ، ساتىپ الۋشىلاردى وزدەرى تاپقان. الاياقتاردىڭ بۇيرىعىمەن ول بۇل سومانى دا كۋرەر ارقىلى وتكىزگەن.
جۋرناليست ناقتى الاياقتاردىڭ قۇربانى بولعانىن 4 شىلدەدە عانا بىلگەن. ۇيگە پوليتسيامەن بىرگە كەلگەن ساتىپ الۋشىلار جاعدايدى ءتۇسىندىرىپ كەتكەن. سول كەزدە عانا ونىڭ الدانىپ قالعانى انىقتالدى. قازىر بۇل ءىس بويىنشا قىلمىستىق ءىس قوزعالىپ، ءۇي ارەستكە قويىلعان.
كاكەن قامزيننىڭ ايتۋىنشا، ءۇيدى ساتىپ العان كوپبالالى وتباسى دا الاياقتاردىڭ قۇربانى. ولار دا باسپاناسىز قالعالى وتىر. جۋرناليست بۇل وقيعامەن ءبولىسۋ ارقىلى وزگەلەردىڭ دە ساق بولۋىن قالايدى.
