ىشكى ىستەر مينيسترلىگىنىڭ كيبەرقىلمىسقا قارسى ءىس-قيمىل دەپارتامەنتى ۋكراينانىڭ ۇلتتىق پوليتسياسىمەن، باس پروكۋراتۋراسىمەن جانە قازاقستاننىڭ باس پروكۋراتۋراسىمەن بىرلەسكەن ارنايى وپەراتسيا جۇرگىزدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
ناتيجەسىندە قازاقستاندىقتاردى الداۋمەن اينالىسقان ترانسۇلتتىق قىلمىستىق توپتىڭ جولى كەسىلدى.
جەدەل ءىس-شارالار چەرنوۆتسى مەن ودەسسا قالالارىندا ءوتتى. تەرگەۋ بارىسىندا الاياقتار قازاقستاننىڭ ۇلتتىق بانكى، قۇقىق قورعاۋ ورگاندارى مەن ارنايى قىزمەتتەرى اتىنان حابارلاسىپ، ازاماتتاردى نەسيە الۋعا، مۇلكىن ساتۋعا جانە دەپوزيتتەگى قاراجاتتى بوتەن شوتتارعا اۋدارۋعا ماجبۇرلەگەنى انىقتالدى. قاسكويلەر جابىرلەنۋشىلەرگە «كۇدىكتى وپەراتسيالار» نەمەسە «تەرروريستىك ۇيىمداردى قارجىلاندىرۋ» ايىبىن تاعامىز دەپ قورقىتىپ، پسيحولوگيالىق قىسىم كورسەتكەن.
قىلمىستىق توپتىڭ قۇرىلىمى ناقتى يەرارحياعا قۇرىلعان. ورتالىقتا اكىمشىلەر، HR-مەنەدجەرلەر، «كلوۋزەرلەر»، تەحنيكالىق ماماندار جانە ءتىپتى «كۇشتىك بلوك» تا بولعان. ۇيىمداستىرۋشىلار جالعان كۋالىكتەر، ارنايى ستسەناريلەر مەن deepfake باعدارلامالارىن قولدانعان.
ءتىنتۋ بارىسىندا 30-دان استام كومپيۋتەر، 79 تەلەفون، sim-كارتالار، جالعان كۋالىكتەر جانە الاياقتىققا ارنالعان قۇجاتتار تاركىلەندى. تەرگەۋشىلەردىڭ مالىمەتىنشە، تەك سوڭعى التى ايدا كۇدىكتىلەردىڭ ءبىرى بەس اۆتوكولىك ساتىپ الىپ ۇلگەرگەن. Call-ورتالىقتىڭ جۇمىسىن جۇرگىزۋگە ايىنا شامامەن 60 مىڭ دوللار جۇمسالعان.
الدىن الا ەسەپ بويىنشا، الاياقتار قازاقستاندىقتارعا 900 ميلليون تەڭگەدەن استام زيان كەلتىرگەن. ارنايى وپەراتسيا ناتيجەسىندە ۋكراينانىڭ توعىز ازاماتى ۇستالىپ، ونىڭ بەسەۋى قاماۋعا الىندى.
قر ءىىم بۇل وپەراتسيا ەكى ەلدىڭ قۇقىق قورعاۋ ورگاندارىنىڭ ۇيلەسىمدى جۇمىسىنىڭ ناتيجەسىندە جۇزەگە اسقانىن جانە ازاماتتاردىڭ قاۋىپسىزدىگىن قورعاۋعا باعىتتالعانىن اتاپ ءوتتى.
