Işkı ıster ministrlıgınıŋ kiberqylmysqa qarsy ıs-qimyl departamentı Ukrainanyŋ ūlttyq polisiiasymen, Bas prokuraturasymen jäne Qazaqstannyŋ Bas prokuraturasymen bırlesken arnaiy operasiia jürgızdı, dep habarlaidy "Adyrna" ūlttyq portaly QazAqparatqa sıltep.
Nätijesınde qazaqstandyqtardy aldaumen ainalysqan transūlttyq qylmystyq toptyŋ joly kesıldı.
Jedel ıs-şaralar Chernovsy men Odessa qalalarynda öttı. Tergeu barysynda alaiaqtar Qazaqstannyŋ Ūlttyq Bankı, qūqyq qorǧau organdary men arnaiy qyzmetterı atynan habarlasyp, azamattardy nesie aluǧa, mülkın satuǧa jäne depozittegı qarajatty böten şottarǧa audaruǧa mäjbürlegenı anyqtaldy. Qasköiler jäbırlenuşılerge «küdıktı operasiialar» nemese «terroristık ūiymdardy qarjylandyru» aiybyn taǧamyz dep qorqytyp, psihologiialyq qysym körsetken.
Qylmystyq toptyŋ qūrylymy naqty ierarhiiaǧa qūrylǧan. Ortalyqta äkımşıler, HR-menedjerler, «klouzerler», tehnikalyq mamandar jäne tıptı «küştık blok» ta bolǧan. Ūiymdastyruşylar jalǧan kuälıkter, arnaiy ssenariiler men deepfake baǧdarlamalaryn qoldanǧan.
Tıntu barysynda 30-dan astam kompiuter, 79 telefon, sim-kartalar, jalǧan kuälıkter jäne alaiaqtyqqa arnalǧan qūjattar tärkılendı. Tergeuşılerdıŋ mälımetınşe, tek soŋǧy alty aida küdıktılerdıŋ bırı bes avtokölık satyp alyp ülgergen. Call-ortalyqtyŋ jūmysyn jürgızuge aiyna şamamen 60 myŋ dollar jūmsalǧan.
Aldyn ala esep boiynşa, alaiaqtar qazaqstandyqtarǧa 900 million teŋgeden astam ziian keltırgen. Arnaiy operasiia nätijesınde Ukrainanyŋ toǧyz azamaty ūstalyp, onyŋ beseuı qamauǧa alyndy.
QR IIM būl operasiia ekı eldıŋ qūqyq qorǧau organdarynyŋ üilesımdı jūmysynyŋ nätijesınde jüzege asqanyn jäne azamattardyŋ qauıpsızdıgın qorǧauǧa baǧyttalǧanyn atap öttı.
