قازاقستاندا كامەلەتكە تولماعاندارعا قارسى جىنىستىق سيپاتتاعى قىلمىس جاساعاندارعا قولدانىلاتىن حيميالىق كاستراتسيا تارتىبىنە وزگەرىس ەنگىزىلمەك، دەپ حابارلايدى "ادىرنا" ۇلتتىق پورتالى.
بۇل تۋرالى دەنساۋلىق ساقتاۋ مينيسترلىگى باستاماشى بولعان زاڭ جوباسى “اشىق نقا” پورتالىندا جاريالانىپ، 18 تامىزعا دەيىن قوعامدىق تالقىلاۋعا ۇسىنىلعان.
جوبا اياسىندا جازاسىن وتەپ جاتقان ادامدارعا قاتىستى مىناداي ناقتى ءتارتىپ ەنگىزۋ قاراستىرىلعان:
سوت-پسيحياتريالىق ساراپتاما تاعايىنداۋ ءۇشىن تۇزەۋ مەكەمەسى اكىمشىلىگى سوتقا ماتەريالداردى جازاسىن وتەۋ مەرزىمى اياقتالعانعا دەيىن كەمىندە 12 اي بۇرىن جولداۋى ءتيىس.
حيميالىق كاستراتسيا جازاسىن وتەۋشى تۇرمەدەن بوساپ شىعۋىنا 6 اي قالعاندا قولدانىلۋى كەرەك.
بۇل وزگەرىستەر جىنىستىق قىلمىستاردىڭ قايتالانۋىن بولدىرماۋعا باعىتتالعان.
ايتا كەتەيىك، قازاقستاندا حيميالىق كاستراتسيا شاراسى 18 جاسقا تولعان، كامەلەتكە تولماعاندارعا قارسى جىنىستىق سيپاتتاعى قىلمىس جاساعان ادامدارعا قاتىستى قولدانىلادى.
بۇعان دەيىن ىشكى ىستەر مينيسترلىگى بالالارعا قارسى جىنىستىق قىلمىس جاساعان ادامداردى ءومىر بويىنا تىركەۋگە الىپ، باقىلاۋدا ۇستاۋ جونىندە باستاما كوتەرگەن بولاتىن. بۇل دا سول زاڭ جوباسى اياسىندا قاراستىرىلۋدا.
