2025 جىلعى 7–10 تامىز ارالىعىندا الماتى قالاسىندا ۇلى قازاق اقىنى، ويشىلى جانە اعارتۋشىسى اباي قۇنانبايۇلىنىڭ 180 جىلدىق مەرەيتويىنا ارنالعان ونلاين-چەللەندج وتۋدە. بۇل باستاما ابايدىڭ ادەبي جانە فيلوسوفيالىق مۇراسىن كەڭ اۋديتورياعا ناسيحاتتاۋعا باعىتتالعان.
چەللەندجدىڭ ماقساتى — قازاقستاندىقتاردى ماڭىزدى داتامەن قۇتتىقتاپ، اقىن شىعارمالارىندا كورىنىس تاپقان رۋحاني قۇندىلىقتاردى قايتا زەردەلەۋگە جانە ولاردى كەڭىنەن تاراتۋعا شابىت بەرۋ.
ونلاين-چەللەندجگە قازىردىڭ وزىندە كوپتەگەن ادامدار قوسىلدى. ولاردىڭ قاتارىندا مادەنيەت، سپورت، عىلىم، ءبىلىم بەرۋ، جاستار ۇيىمدارى، ساياسي پارتيالار وكىلدەرى، ءماجىلىس دەپۋتاتتارى، قازاقستان حالقى اسسامبلەياسىنىڭ مۇشەلەرى، سونداي-اق ونەر، مەديا جانە قوعام قايراتكەرلەرى بار. اتاپ ايتقاندا: وكتەم التاەۆ، اسحات تارعىن، جۇبانىش جەكسەنۇلى، ماقسات بازارباەۆ، سايات نۇرعازين، داۋرەن ءبايبورى، مارتا تولەپبەرگەن، گۋسمان كىرگىزباەۆ جانە تاعى باسقالار.
ماسەلەن، قازاقستاندىق دزيۋدوشى، 2024 جىلعى جازعى وليمپيادا ويىندارىنىڭ قولا جۇلدەگەرى گۋسمان كىرگىزباەۆ ءوز ۆيدەوقۇتتىقتاۋىندا ابايدىڭ «سەنبە جۇرتقا، تۇرسا دا قانشا ماقتاپ» اتتى ولەڭىنەن ءۇزىندى وقىدى.
قازاقستاننىڭ ەڭبەك سىڭىرگەن قايراتكەرى، قازاق ەستراداسىنىڭ جارىق جۇلدىزى جۇبانىش جەكسەنۇلى ابايدىڭ «قاراڭعى تۇندە تاۋ قالعىپ» اتتى شىعارماسىن ورىنداپ، ەستافەتانى تانىمال ءانشى ماقسات بازارباەۆقا جولدادى. ءوز كەزەگىندە ول «كوزىمنىڭ قاراسى» انىنەن ءۇزىندى ورىندادى.
چەللەندج كەڭىنەن تارالىپ، ۇلكەن مادەني قوزعالىسقا اينالۋدا. بۇل قوزعالىس قازاقستاندىقتاردى اباي ۇستانعان — بىلىمگە ۇمتىلۋ، ادىلدىك، ادامگەرشىلىك جانە ءوزىن-ءوزى دامىتۋ سياقتى ماڭگىلىك قۇندىلىقتار توڭىرەگىندە بىرىكتىرۋدە.
كەز كەلگەن ادام ابايدىڭ ولەڭدەرىنەن، «قارا سوزدەرىنەن» نەمەسە باسقا شىعارمالارىنان ءۇزىندى وقىپ، قىسقا ۆيدەوقۇتتىقتاۋ جازا الادى. بەينەروليك سوڭىندا قاتىسۋشىلار چەللەندجدى دوستارىنا، ارىپتەستەرىنە، تانىستارىنا جانە جازىلۋشىلارىنا جولداپ، ولاردى اكتسياعا قوسىلۋعا شاقىرادى.
دايىن ۆيدەولار TikTok, Instagram, Facebook جانە Threads الەۋمەتتىك جەلىلەرىندە #اباي180جىل جانە #Abai180 حەشتەگتەرىمەن جاريالانادى.
