2025 jylǧy 7–10 tamyz aralyǧynda Almaty qalasynda ūly qazaq aqyny, oişyly jäne aǧartuşysy Abai Qūnanbaiūlynyŋ 180 jyldyq mereitoiyna arnalǧan onlain-chellendj ötude. Būl bastama Abaidyŋ ädebi jäne filosofiialyq mūrasyn keŋ auditoriiaǧa nasihattauǧa baǧyttalǧan.
Chellendjdıŋ maqsaty — qazaqstandyqtardy maŋyzdy datamen qūttyqtap, aqyn şyǧarmalarynda körınıs tapqan ruhani qūndylyqtardy qaita zerdeleuge jäne olardy keŋınen taratuǧa şabyt beru.
Onlain-chellendjge qazırdıŋ özınde köptegen adamdar qosyldy. Olardyŋ qatarynda mädeniet, sport, ǧylym, bılım beru, jastar ūiymdary, saiasi partiialar ökılderı, Mäjılıs deputattary, Qazaqstan halqy Assambleiasynyŋ müşelerı, sondai-aq öner, media jäne qoǧam qairatkerlerı bar. Atap aitqanda: Öktem Altaev, Ashat Tarǧyn, Jūbanyş Jeksenūly, Maqsat Bazarbaev, Saiat Nūrǧazin, Däuren Baibörı, Marta Tölepbergen, Gusman Kyrgyzbaev jäne taǧy basqalar.
Mäselen, Qazaqstandyq dziudoşy, 2024 jylǧy jazǧy Olimpiada oiyndarynyŋ qola jüldegerı Gusman Kyrgyzbaev öz videoqūttyqtauynda Abaidyŋ «Senbe jūrtqa, tūrsa da qanşa maqtap» atty öleŋınen üzındı oqydy.
Qazaqstannyŋ eŋbek sıŋırgen qairatkerı, qazaq estradasynyŋ jaryq jūldyzy Jūbanyş Jeksenūly Abaidyŋ «Qaraŋǧy tünde tau qalǧyp» atty şyǧarmasyn oryndap, estafetany tanymal änşı Maqsat Bazarbaevqa joldady. Öz kezegınde ol «Közımnıŋ qarasy» änınen üzındı oryndady.
Chellendj keŋınen taralyp, ülken mädeni qozǧalysqa ainaluda. Būl qozǧalys qazaqstandyqtardy Abai ūstanǧan — bılımge ūmtylu, ädıldık, adamgerşılık jäne özın-özı damytu siiaqty mäŋgılık qūndylyqtar töŋıregınde bırıktırude.
Kez kelgen adam Abaidyŋ öleŋderınen, «Qara sözderınen» nemese basqa şyǧarmalarynan üzındı oqyp, qysqa videoqūttyqtau jaza alady. Beinerolik soŋynda qatysuşylar chellendjdı dostaryna, ärıptesterıne, tanystaryna jäne jazyluşylaryna joldap, olardy aksiiaǧa qosyluǧa şaqyrady.
Daiyn videolar TikTok, Instagram, Facebook jäne Threads äleumettık jelılerınde #Abai180jyl jäne #Abai180 heştegterımen jariialanady.
