جۋرناليست يليا استاحوۆ «باستاۋ» قورىنىڭ قىمبات كولىكتەرى ءجيى جول ەرەجەسىن بۇزعانىن انىقتادى، دەپ حابارلايدى "ادىرنا" ۇلتتىق پورتالى Exclusive.kz-كە سىلتەپ.
باق-تا تاراعان مالىمەتكە سايكەس، وردىڭ جالعىز قۇرىلتايشىسى – قازاقستاننىڭ بۇرىنعى پرەزيدەنتى نۇرسۇلتان نازارباەۆ.
استاحوۆتىڭ ايتۋىنشا، قوردىڭ ناقتى نەمەن اينالىساتىنى بەلگىسىز، الايدا ونىڭ بالانسىندا جالپى قۇنى شامامەن 800 ملن تەڭگە تۇراتىن ليۋكس اۆتوكولىكتەر بار. سونداي-اق، قور كولىكتەرىنە 45 اكىمشىلىك قۇقىقبۇزۋشىلىق حاتتاماسى تىركەلگەن. ونىڭ 44-ءى – جول قوزعالىسى ەرەجەسىن بۇزۋ ەكەنى بەلگىلى بولدى.
قور اۆتوپاركىنە Chevrolet Tahoe, Nissan Patrol, Mercedes-Benz S450 4MATIC, Lexus LX 570, Cadillac Escalade, Tesla Model X, ءۇش Toyota Land Cruiser Prado جانە ءبىر Land Cruiser 250, Audi A6, KIA Optima, Toyota Camry جانە BYD Song Plus كىرەدى.
تىركەلگەن زاڭبۇزۋشىلىقتار قاتارىندا جىلدامدىقتى اسىرۋ، اۆتوبۋستارعا ارنالعان جولاققا شىعۋ، قىزىل جارىقتان ءوتۋ جانە اقىلى تۇراق اقىسىن تولەمەۋ بار. ەڭ كوپ ەرەجە بۇزعان كولىك رەتىندە اق ءتۇستى Toyota Land Cruiser Prado تىركەلگەن. اتالمىش كولىككە توعىز حاتتاما راسىمدەلگەنى انىقتالدى.
ال Chevrolet Tahoe كولىگى ءجيى پرەزيدەنتتىك رەزيدەنتسيا ماڭىندا، استانا-قاراعاندى تراسساسىندا بايقالعان.
استاحوۆتىڭ دەرەگىنشە، زاڭبۇزۋشىلىقتاردىڭ كوپشىلىگى نازارباەۆتىڭ ەلوردادا بولعان ۋاقىتتارىمەن سايكەس كەلەدى. نەگىزگى بولىگى 2024 جىلعى قازان–قاراشا جانە 2025 جىلعى ماۋسىم–شىلدە ايلارىنا تيەسىلى. بۇل كەزەڭدەردە ەكس-پرەزيدەنت استاناعا اەس قۇرىلىسى جونىندەگى رەفەرەندۋمعا جانە مەشىتكە ساپارى كەزىندە كەلگەن.
