ۋكراينا پرەزيدەنتى ۆلاديمير زەلەنسكي ەلدىڭ وككۋپاتسيالانعان اۋماقتارىن ەشكىمگە “سىيلامايتىنىن” مالىمدەدى، دەپ حابارلايدى "ادىرنا" ۇلتتىق پورتالى.
ۋكراينا پرەزيدەنتى Telegram-ارناسىندا ۋكراين حالقى ءوز جەرىن قورعاپ، بەيبىت ءومىر سۇرۋگە لايىق ەكەنىن اتاپ ءوتتى.
"بۇل سوعىستى توقتاتۋ كەرەك، جانە ونى رەسەي توقتاتۋى ءتيىس. رەسەي سوعىستى ءوزى باستاپ، ونى سوزىپ وتىر. ماسەلە باسقا ەمەس، ءدال وسىندا", — دەدى زەلەنسكي.
ونىڭ ايتۋىنشا، ەل اۋماعىنا قاتىستى جاۋاپ ۋكراينا كونستيتۋتسياسىندا انىق جازىلعان جانە ودان ەشكىم باس تارتپايدى.
"ۋكرايندار ءوز جەرىن وككۋپانتارعا بەرمەيدى. ۋكراينا تەك شىنايى بەيبىتشىلىككە جەتكىزەتىن شەشىمدەرگە دايىن. ءبىزسىز قابىلدانعان كەز كەلگەن شەشىم بەيبىتشىلىككە قارسى بولىپ سانالادى", — دەپ قوستى ول.
زەلەنسكي اقش پرەزيدەنتى دونالد ترامپ جانە وزگە دە حالىقارالىق ارىپتەستەرمەن بەرىك بەيبىتشىلىك ورناتۋ ءۇشىن جۇمىس ىستەۋگە دايىن ەكەنىن ايتتى.
ايتا كەتەيىك، بۇعان دەيىن رەسەي پرەزيدەنتى ۆلاديمير پۋتين مەن اقش پرەزيدەنتى دونالد ترامپتىڭ ۋكراينا ماسەلەسىن تالقىلاۋ ءۇشىن كەزدەسۋ وتكىزەتىنى حابارلانعان. الدىن الا مالىمەت بويىنشا، باسقوسۋ ءباا-دە ءوتۋى مۇمكىن.
