اقش پەن يران كەلىسىمگە كەلە المادى. بۇل تۋرالى اقش-تىڭ ۆيتسە-پرەزيدەنتى دجەي دي ۆەنس ءباسپاسوز ءماسليحاتىندا مالىمدەدى، دەپ حابارلايدى "ادىرنا".
ونىڭ ايتۋىنشا، ۆاشينگتون تەگەران ازىرگە ءوزىنىڭ يادرولىق باعدارلاماسىنان باس تارتۋعا دايىن ەمەس دەپ ەسەپتەيدى.
يسلامابادتا وتكەن ءۇش راۋند كەلىسسوزدەرگە قاراماستان، تاراپتار ورتاق شەشىمگە كەلە المادى. باق مالىمەتىنشە، كەزدەسۋلەر بارىسىندا ورمۋز بۇعازى، يادرولىق باعدارلاما، وتەماقى، سانكتسيالاردى الىپ تاستاۋ جانە وڭىرلىك قاقتىعىستاردى رەتتەۋ ماسەلەلەرى تالقىلانعان.
«جامان جاڭالىق– ءبىز كەلىسىمگە كەلە المادىق. مەنىڭ ويىمشا، بۇل يران ءۇشىن اقش-قا قاراعاندا ءتيىمسىز»، – دەپ اتاپ ءوتتى ۆەنس.
ال يران سىرتقى ىستەر مينيسترلىگىنىڭ وكىلى يسمايل باگاي يسلامابادتاعى ناتيجەسىز وتكەن كەلىسسوزدەردەن كەيىن تەگەران اقش-پەن ءبىر عانا كەزدەسۋدە كەلىسىمگە كەلەدى دەپ باستاپقىدا كۇتپەگەنىن مالىمدەدى.
ء«بىر راۋند اياسىندا كەلىسىمگە كەلمەۋ – قالىپتى جاعداي»، – دەدى ول.
سونداي-اق، باگاي پاكىستانمەن جانە ايماقتاعى باسقا ەلدەرمەن بايلانىستار جالعاساتىنىن اتاپ ءوتتى.
وسى جاعداي اياسىندا پارسى شىعاناعى ايماعىنداعى مىڭداعان مۇناي تانكەرلەرى ءۇشىن ورمۋز بۇعازى جابىق كۇيىندە قالۋى مۇمكىن. بۇعان دەيىن دونالد ترامپ يرانعا كەمە قاتىناسىن بۇعاتتاعان جاعدايدا «اۋىر سالدارلار» بولاتىنىن ەسكەرتكەن ەدى.
