دونالد ترامپ يران كەلىسىم شارتتارىن تولىق ورىنداماعان جاعدايدا اقش بۇرىن-سوڭدى بولماعان اۋقىمدى ءارى كۇشتى سوققىلار جاسايتىنىن مالىمدەدى، دەپ حابارلايدى "ادىرنا" ۇلتتىق پورتالى.
بۇل تۋرالى پرەزيدەنت Truth Social جەلىسىندەگى پاراقشاسىندا جازدى.
ترامپتىڭ ايتۋىنشا، ورمۇز بۇعازى ارقىلى ەركىن جانە قاۋىپسىز ءوتۋ قامتاماسىز ەتىلىپ، يران يادرولىق قارۋعا قول جەتكىزۋدەن باس تارتۋى ءتيىس. ول سونداي-اق اقش-تىڭ اسكەري كۇشتەرى مەن تەحنيكاسى يران اينالاسىندا كەلىسىم تولىق ورىندالعانعا دەيىن ءوز پوزيتسيالارىندا قالا بەرەتىنىن اتاپ ءوتتى.
سونىمەن قاتار يسپانيا، ۇلىبريتانيا جانە فرانتسيا سىندى ەۋروپا ەلدەرى تاياۋ شىعىستا قول جەتكىزىلگەن ءبىتىمدى ليۆان اۋماعىنا دا تاراتۋعا شاقىردى. ەو-نىڭ سىرتقى ساياسات جونىندەگى جوعارعى وكىلى كايا كاللاس تا وسى ۇستانىمدى قولدادى.
يسپانيا ءسىم باسشىسى حوسە مانۋەل البارەس ءيزرايلدىڭ اۋە سوققىلارى حالىقارالىق قۇقىقتى بۇزىپ وتىرعانىن مالىمدەدى. ال ۇلىبريتانيا ءىىم باسشىسى يۆەتت كۋپەر بۇل ارەكەتتەردى «وتە زياندى» دەپ اتادى. فرانتسيا ءسىم جەتەكشىسى جان-نوەل باررو 8 ساۋىردەگى «جاپپاي شابۋىلداردى» ايىپتادى.
ءوز كەزەگىندە ماسۋد پەزەشكيان ءيزرايلدىڭ ليۆانعا جاساعان سوققىلارى ءبىتىم شارتىن بۇزىپ، كەلىسسوزدەردىڭ ءمانىن جويىپ وتىرعانىن ايتتى.
يران قولدايتىن حەزبوللاح قوزعالىسى دا يزرايلگە قارسى سوققىلارىن جالعاستىراتىنىن مالىمدەدى. توپ وكىلدەرىنىڭ ايتۋىنشا، جاۋاپ شابۋىلدارى يزرايل «اگرەسسياسىن» توقتاتقانعا دەيىن جالعاسادى.
Reuters اگەنتتىگىنىڭ مالىمەتىنشە، ءيزرايلدىڭ اۋە سوققىلارى سالدارىنان 250-دەن استام ادام قازا تاۋىپ، 890-نان استامى جارالانعان. بۇۇ باس حاتشىسى انتونيۋ گۋتەرريش بۇل شابۋىلداردى قاتاڭ ايىپتاپ، ولاردىڭ سالدارىنان بەيبىت تۇرعىندار، سونىڭ ىشىندە بالالار زارداپ شەككەنىن مالىمدەدى.
