Donald Tramp İran kelısım şarttaryn tolyq oryndamaǧan jaǧdaida AQŞ būryn-soŋdy bolmaǧan auqymdy ärı küştı soqqylar jasaitynyn mälımdedı, dep habarlaidy "Adyrna" ūlttyq portaly.
Būl turaly prezident Truth Social jelısındegı paraqşasynda jazdy.
Tramptyŋ aituynşa, Ormūz būǧazy arqyly erkın jäne qauıpsız ötu qamtamasyz etılıp, İran iadrolyq qaruǧa qol jetkızuden bas tartuy tiıs. Ol sondai-aq AQŞ-tyŋ äskeri küşterı men tehnikasy İran ainalasynda kelısım tolyq oryndalǧanǧa deiın öz pozisiialarynda qala beretının atap öttı.
Sonymen qatar İspaniia, Ūlybritaniia jäne Fransiia syndy Europa elderı Taiau Şyǧysta qol jetkızılgen bıtımdı Livan aumaǧyna da taratuǧa şaqyrdy. EO-nyŋ syrtqy saiasat jönındegı joǧarǧy ökılı Kaia Kallas ta osy ūstanymdy qoldady.
İspaniia SIM basşysy Hose Manuel Albares İzraildıŋ äue soqqylary halyqaralyq qūqyqty būzyp otyrǧanyn mälımdedı. Al Ūlybritaniia IIM basşysy İvett Kuper būl äreketterdı «öte ziiandy» dep atady. Fransiia SIM jetekşısı Jan-Noel Barro 8 säuırdegı «jappai şabuyldardy» aiyptady.
Öz kezegınde Masud Pezeşkian İzraildıŋ Livanǧa jasaǧan soqqylary bıtım şartyn būzyp, kelıssözderdıŋ mänın joiyp otyrǧanyn aitty.
İran qoldaityn Hezbollah qozǧalysy da İzrailge qarsy soqqylaryn jalǧastyratynyn mälımdedı. Top ökılderınıŋ aituynşa, jauap şabuyldary İzrail «agressiiasyn» toqtatqanǧa deiın jalǧasady.
Reuters agenttıgınıŋ mälımetınşe, İzraildıŋ äue soqqylary saldarynan 250-den astam adam qaza tauyp, 890-nan astamy jaralanǧan. BŪŪ Bas hatşysy Antoniu Guterriş būl şabuyldardy qataŋ aiyptap, olardyŋ saldarynan beibıt tūrǧyndar, sonyŋ ışınde balalar zardap şekkenın mälımdedı.
