اقش سيريا اۋماعىنداعى اسكەري كۇشتەرىن كەزەڭ-كەزەڭىمەن شىعارۋعا كىرىستى، دەپ حابارلايدى "ادىرنا" ۇلتتىق پورتالى جەرگىلىكتى باق-قا سىلتەپ.
بۇل پروتسەسس ەلدىڭ سولتۇستىك-شىعىسىنداعى حاساكا پروۆينتسياسىندا ورنالاسقان كاسراك بازاسىنان باستالعان.
جەرگىلىكتى اقپارات كوزدەرىنىڭ دەرەگىنشە، بازا اۋماعىنان اسكەري تەحنيكا تيەلگەن بىرنەشە ونداعان جۇك كولىگى شىعارىلىپ، ولار كولوننا تۇرىندە يراك شەكاراسىنا قاراي باعىت العان. اسكەريلەردىڭ ءبىر بولىگى يراكتىڭ كۇردىستان ايماعىنا ورنالاستىرىلۋى مۇمكىن.
حالىقارالىق باق مالىمەتىنە سايكەس، اسكەري كۇشتەردى شىعارۋ بىرنەشە اپتاعا سوزىلادى. سوڭعى ايدا اقش سيرياداعى باسقا دا بىرقاتار نىسانداردان، سونىڭ ىشىندە شەددادي مەن ات-تانف ايماقتارىنان اسكەرىن اكەتكەن.
قازىرگى ۋاقىتتا امەريكالىق اسكەري كونتينگەنت ەلدىڭ كەيبىر بازالارىندا ءالى دە ساقتالعان. الايدا ۆاشينگتون سيرياداعى جالپى اسكەري قاتىسۋىن قىسقارتۋدى جالعاستىرىپ، جاقىن ۋاقىتتا ونى تولىق اياقتاۋدى جوسپارلاپ وتىر.
الدىن الا دەرەكتەر بويىنشا، سيريادا قالعان شامامەن مىڭعا جۋىق امەريكالىق سارباز ەكى اي ىشىندە تولىق شىعارىلۋى مۇمكىن.
