14 جەلتوقساندا بەرليندە وتكەن ۋكراينا مەن اقش دەلەگاتسيالارى اراسىنداعى كەلىسسوز بەس ساعاتتان استام ۋاقىتقا سوزىلدى. بۇل تۋرالى Reuters اگەنتتىگى جازدى، دەپ حابارلايدى «ادىرنا» ءتىلشىسى.
ۋكراينا پرەزيدەنتىنىڭ كەڭەسشىسى دميتري ءليتۆيننىڭ ايتۋىنشا، تاراپتار جۇمىستى 15 جەلتوقسان كۇنى تاڭەرتەڭ جالعاستىرۋعا كەلىسكەن. سونداي-اق ول كەلىسسوزدەر اياقتالعان سوڭ پرەزيدەنت ۆلاديمير زەلەنسكي بۇل ماسەلە بويىنشا پىكىر بىلدىرەتىنىن ناقتىلادى.
كەزدەسۋگە ۋكراينا پرەزيدەنتى ۆلاديمير زەلەنسكي، اقش پرەزيدەنتىنىڭ ارنايى وكىلى ستيۆ ۋيتكوفف جانە دونالد ترامپتىڭ كۇيەۋ بالاسى دجارەد كۋشنەر قاتىستى. تاراپتار 20 تارماقتان تۇراتىن بەيبىتشىلىك جوسپارىنىڭ مازمۇنىن تالقىلاعان.
كەلىسسوزدەر قورىتىندىسى بويىنشا ستيۆ ۋيتكوفف ايتارلىقتاي ىلگەرىلەۋ بولعانىن مالىمدەدى. ونىڭ ايتۋىنشا، تاراپتار بەيبىت رەتتەۋگە ارنالعان 20 تارماقتى جوسپار، ەكونوميكالىق ماسەلەلەر جانە وزگە دە تاقىرىپتار بويىنشا جان-جاقتى پىكىر الماسقان.
«ەلەۋلى پروگرەسكە قول جەتكىزىلدى، تاراپتار ەرتەڭ تاڭەرتەڭ قايتا كەزدەسەدى»، — دەپ جازدى ول 14 جەلتوقساندا X الەۋمەتتىك جەلىسىندە.
زەلەنسكيدىڭ مالىمدەۋىنشە، كەلىسسوزدەر «بەيبىتشىلىكتىڭ ىرگەتاسىنا» جانە رەسەي مەن ۋكراينا اراسىنداعى قاقتىعىستى بەيبىت جولمەن رەتتەۋگە ارنالماق.
ايتا كەتەيىك، 2 جەلتوقساندا ستيۆ ۋيتكوفف پەن دجارەد كۋشنەر رەسەي پرەزيدەنتى ۆلاديمير پۋتينمەن كرەملدە كەلىسسوزدەر جۇرگىزگەن بولاتىن.
