مەملەكەت باسشىسى قاسىم-جومارت توقاەۆ اقمولا وبلىسىنىڭ اكىمى مارات احمەتجانوۆتى قابىلدادى. بۇل تۋرالى بۇگىن، 18 تامىزدا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
قاسىم-جومارت توقاەۆقا اقمولا وبلىسىنىڭ بيىلعى ءبىرىنشى جارتىجىلدىقتاعى الەۋمەتتىك-ەكونوميكالىق دامۋى مەن ءوڭىردى وركەندەتۋ پەرسپەكتيۆاسى جونىندە باياندالدى.
مارات احمەتجانوۆ وبلىستا بارلىق نەگىزگى كورسەتكىش بويىنشا ءوسىم ساقتالىپ وتىرعانىن جەتكىزدى. ءوڭىر اۋىل شارۋاشىلىعى ونىمدەرىنىڭ جالپى كولەمىن 1,2 تريلليون تەڭگەگە دەيىن جەتكىزىپ، ەلدىڭ اگرارلىق سەكتورىنىڭ كوشباسشىسى رەتىندەگى ورنىن نىعايتۋدى كوزدەپ وتىر. بيىل ونىمدىلىگى وتە جوعارى، سونىڭ ىشىندە مايلى داقىلدار القابى 2,5 ەسە ۇلعايدى.
پرەزيدەنتكە ينۆەستيتسيالىق جوبالاردى ىسكە اسىرۋ جونىندە مالىمەت بەرىلدى. ارشالى اۋدانىندا رەسپۋبليكالىق ماڭىزى بار Aqmola يندۋستريالىق ايماعى قۇرىلدى. جالپى قۇنى 4 ميلليارد دوللاردان اساتىن ينۆەستيتسيالىق پورتفەل جاساقتالدى. وسى ارقىلى 10 مىڭعا جۋىق جۇمىس ورنى اشىلادى.
مەملەكەت باسشىسىنا الەۋمەتتىك ينفراقۇرىلىمدار قۇرىلىسىنىڭ بارىسى تانىستىرىلدى. سوڭعى ەكى جىل ىشىندە 4,7 مىڭ تۇرعىن باسپانالى بولدى. بۇل الدىڭعى جەتى جىلدىڭ كورسەتكىشىنە تەڭ. وسىلايشا، كەزەكتە تۇرعان حالىقتىڭ الەۋمەتتىك وسال توبى 29 پايىزعا ازايدى. قوسشى قالاسىندا ۇلەسكەرلەردىڭ ماسەلەسى وڭ شەشىلىپ جاتىر.
ءبىلىم بەرۋ سالاسىندا ەكى جىل ىشىندە 21 مىڭ وقۋشىعا ارنالعان 33 نىسان بوي كوتەردى. جاڭا وقۋ جىلى قارساڭىندا وڭىردە اپاتتى جاعدايداعى جانە ءۇش اۋىسىمدى مەكتەپتەر ماسەلەسى تولىق شەشىلدى.
جىلىتۋ ماۋسىمىنا دايىندىق جوسپارعا ساي جۇرگىزىلىپ جاتىر. كوكشەتاۋدا ەلەكتر قۋاتى 240 مۆت، ال جىلۋ قۋاتى 520 گكال/ساعات بولاتىن جىلۋ ەلەكتر ورتالىعى سالىنا باستادى. سۋ تازارتۋ نىساندارىنىڭ قۇرىلىسى اياقتالۋعا جاقىن. سونىڭ ناتيجەسىندە وبلىس ورتالىعىندا تۇراتىن 200 مىڭ تۇرعىن ساپالى اۋىز سۋمەن قامتىلادى. جىل سوڭىنا دەيىن 9 ەلدى مەكەنگە گاز قۇبىرى تارتىلادى.
كەزدەسۋ سوڭىندا پرەزيدەنت رەنوۆاتسيا باعدارلاماسى ارقىلى حالىقتىڭ الەۋمەتتىك وسال توبىن باسپانامەن قامتۋداعى وبلىستىڭ وڭ تاجىريبەسىن اتاپ ءوتتى. مەملەكەت باسشىسى ەگىن جيناۋ ناۋقانىن ۇيىمداستىرۋ، قوسشى قالاسىنىڭ دامۋى بويىنشا ءتيىستى شارالاردى قابىلداۋ، سۋ تاسقىنىنا قارسى جۇيەلى جۇمىس جۇرگىزۋ، سونداي-اق ينۆەستيتسيا تارتۋ جونىندە ناقتى تاپسىرما بەردى.
