الەۋمەتتىك جەلىدە Bakhram700 ەسىمدى قولدانۋشى استانادا ساتىپ الىنعان مەكتەپ داپتەرلەرىنىڭ بەتىندە رەسەي فەدەراتسياسىنىڭ مەملەكەتتىك گيمنى باسىلعانىن جاريالادى، دەپ حابارلايدى "ادىرنا" ۇلتتىق پورتالى.
بۇل تۋرالى Facebook جەلىسىندە اقپارات تارادى.
«استانا! قىزىم ءۇشىن داپتەر ساتىپ الدىم... ەندى ونى جابىستىرۋعا تۋرا كەلەدى»، – دەپ جازدى جەلى قولدانۋشى.
بۇل جاعداي قوعامدا قىزۋ تالقى تۋعىزدى. جەلى قولدانۋشىلارى «نەگە قازاقستاندىق ءوندىرىستىڭ داپتەرلەرى ساتىلمايدى؟»،ء «بىز سونشالىقتى كەدەيمىز بە، نەگە ءوزىمىزدىڭ ەلدىك سيمۆولدارىمىز جوق؟»، «بالالارىمىز رەسەي گيمنىن جاتتاۋ كەرەك پە؟» دەپ نارازىلىق ءبىلدىردى.
سونىمەن قاتار، قازاقستاندىقتار شەتەلدىك مەملەكەتتىڭ مەملەكەتتىك رامىزدەرىن تاراتۋعا كىم رۇقسات بەرگەنىن جانە كەدەندىك باقىلاۋدىڭ قالاي جۇرگىزىلەتىنىن سۇرادى. كەيبىر پىكىر يەلەرى مۇنداي ارەكەتتى «قوعامدىق تۇراقتىلىققا قاۋىپ توندىرەتىن جاعداي» دەپ باعالاپ، زاڭ اياسىندا شارا قولدانۋدى تالاپ ەتتى.
بۇگىندە دە رەسمي ورگانداردان اقپاراتقا قاتىستى تۇسىنىكتەمە بەرىلمەدى.
ايتا كەتەيىك، ءدال وسىنداي ماسەلەنىڭ بولعانى 2017 جانە 2020 جىلدارى دا باق بەتتەرىندە جاريالانعان ەدى.
2017 جىلى فەيسبۋكتاعى “استانا حوچۋ پوحۆاليت/پوجالوۆاتسيا” توبىندا ايگولەك جاناسىلوۆا ەلوردانىڭ SMALL ساۋدا جەلىسىندەگى دۇكەننەن ساتىپ الىنعان داپتەردىڭ سىرتىندا رەسەي گيمنى جازىلعانىن ايتىپ شاعىمدانعان.
ال 2020 جىلى الەۋمەتتىك جەلى قولدانۋشىسى راحمەتوللا قابىكە بۇل وقيعانىڭ ماگنۋم دۇكەندەر جەلىسىندە دە بولعانىن اتاپ وتكەن.
