امەريكالىق كىتاپ اۆتورلارىنىڭ ءبىر توبى جاساندى ينتەللەكت كومپانياسى Anthropic-پەن اۆتورلىق قۇقىققا قاتىستى داۋدان كەيىن كەلىسىمگە كەلدى، دەپ حابارلايدى "ادىرنا" ۇلتتىق پورتالى.
سەيسەنبى كۇنى اپەللياتسيالىق فەدەرالدىق سوتقا جولدانعان قۇجاتتا تاراپتاردىڭ ۇجىمدىق كەلىسىم بويىنشا مامىلەگە كەلگەنى جانە ونىڭ شارتتارى الداعى اپتادا تۇپكىلىكتى بەكىتىلەتىنى كورسەتىلگەن.
Anthropic بۇل جاعدايعا تۇسىنىكتەمە بەرۋدەن باس تارتسا، اۆتورلاردىڭ ادۆوكاتى دجاستين نەلسون “تاريحي كەلىسىم بارلىق تاراپتارعا پايدا اكەلەدى” دەدى.
بۇل ءىس جي يندۋسترياسى ءۇشىن ماڭىزدى سىناققا اينالدى. ماۋسىم ايىندا سان-فرانتسيسكوداعى اقش اۋداندىق سوتىنىڭ سۋدياسى ۋيليام الساپ Anthropic-ءتىڭ چاتبوتى Claude-تى اۆتورلىق قۇقىقپەن قورعالعان ميلليونداعان كىتاپتاردا وقىتۋىن زاڭدى دەپ تانىپ، ونى اقش اۆتورلىق قۇقىق زاڭىنداعى ء“ادىل پايدالانۋ” دەپ باعالادى. سۋديانىڭ پىكىرىنشە، جي-ءدىڭ ماتىندەردى وڭدەپ، جاڭا دۇنيە جاساۋى ترانسفورماتسيالىق سيپاتقا يە.
الايدا كومپانيانىڭ كىتاپتاردى ينتەرنەتتەگى پيراتتىق “كولەڭكەلى كىتاپحانالاردان” جۇكتەپ العانى جايلى ايىپتاۋلار بويىنشا سوت پروتسەسى ءوتۋى ءتيىس بولاتىن.
بۇعان دەيىن ءۇش جازۋشى — اندرەا بارتتس، چارلز گرەبەر جانە كيرك ۋوللەس دجونسون — Anthropic-ءتى ء“ىرى كولەمدەگى ۇرلىق” جاسادى دەپ ايىپتاپ، كومپانيانىڭ شىعارماشىلىق ەڭبەكتى جويۋ ارقىلى پايدا تاپقىسى كەلەتىنىن مالىمدەگەن.
