1 قىركۇيەك – ءبىلىم كۇنى جانە جاڭا 2025–2026 وقۋ جىلى ۇلىتاۋ وبلىسىندا ايرىقشا قۋانىشپەن باستالدى. قالا مەن اۋدان مەكتەپتەرىندە العاشقى قوڭىراۋ سىڭعىرى ەستىلىپ، جاڭا ءبىلىم ساپارىنا قادام باسقان وقۋشىلارعا ارنالعان سالتاناتتى جيىندار ءوتتى.
بيىلعى وقۋ جىلىنىڭ باستى جاڭالىعى – «كەلەشەك مەكتەپتەرى» ۇلتتىق جوباسى اياسىندا جەزقازعان قالاسىنىڭ قابانباي شاعىن اۋدانىندا 300 ورىندىق جاڭا №12 جالپى ءبىلىم بەرەتىن مەكتەپتىڭ پايدالانۋعا بەرىلۋى.
زاماناۋي ۇلگىدە سالىنعان بۇل ءبىلىم ورداسى جاس ۇرپاقتىڭ ساپالى ءبىلىم الۋىنا كەڭ مۇمكىندىك بەرەدى. مەكتەپتىڭ تابالدىرىعىن اتتاعان ءاربىر شاكىرت ءۇشىن بۇل – ۇلكەن ارمانعا باستايتىن ماڭىزدى قادام. جاڭا وقۋ ورنى جەزقازعاننىڭ يگىلىگىنە قىزمەت ەتىپ، وبلىستىڭ ءبىلىم بەرۋ ينفراقۇرىلىمىن ەداۋىر نىعايتتى.
«كەلەشەك مەكتەبى» – بۇل جاڭا زاماناۋي عيمارات، ياعني كەڭ، جارىق ءارى قاۋىپسىز، بالانىڭ دامۋىنا قولايلى ءبىلىم كەڭىستىگى. مۇندا كاسىبي ۇستازدار ۇجىمى جاس ۇرپاقتىڭ دارىنى مەن قابىلەتىن اشۋعا باعىتتالعان زاماناۋي ادىستەمەلەردى قولدانادى. يننوۆاتسيالىق وقۋ ورتاسى تسيفرلىق قۇرالدارمەن، زەرتحانالارمەن، روبوتوتەحنيكا مەن پاندىك كابينەتتەرمەن جابدىقتالعان. ءار بالا ءتۇرلى ۇيىرمەلەرگە قاتىسىپ، شىعارماشىلىق تۇرعىدا دامۋعا مۇمكىندىك الادى. سونىمەن قاتار، مەكتەپتە كىتاپحانا، اكت زالى، اسحانا، سپورت زالدارى، دەمالىس ايماقتارى، ويىن الاڭدارى مەن شىعارماشىلىق ستۋديالار بار. ەڭ باستىسى – اتا-انامەن سەرىكتەستىك ورناتىلىپ، اشىق قارىم-قاتىناس پەن ءار بالانىڭ جەكە دامۋىنا باعىتتالعان بىرلەسكەن جۇمىس جۇرگىزىلەدى.
جاڭا وقۋ جىلىندا ۇلىتاۋ وبلىسىندا 4150 ءبۇلدىرشىن العاش رەت مەكتەپ تابالدىرىعىن اتتادى. ولار ءۇشىن بۇل – ءبىلىم مەن تاربيەنىڭ العاشقى باسپالداعى، ال ۇستازدار ءۇشىن – جاس ۇرپاقتى ساپالى ءبىلىم مەن ونەگەلى تاربيەگە باۋلۋداعى جاڭا جاۋاپتى كەزەڭنىڭ باستاۋى.
وقۋ جىلى قارساڭىندا وڭىردەگى 7 مەكتەپ كۇردەلى جوندەۋدەن ءوتتى. بۇل جۇمىستار وقۋ ورىندارىنىڭ ماتەريالدىق-تەحنيكالىق بازاسىن نىعايتىپ، بالالاردىڭ جايلى ءارى زاماناۋي ورتادا ءبىلىم الۋىنا جاعداي جاسادى.
ايتا كەتەيىك، 2027 جىلعا دەيىن رەنوۆاتسيا باعدارلاماسى اياسىندا وبلىستىڭ جالپى 18 ءبىلىم وشاعى كەزەڭ-كەزەڭىمەن جاڭعىرتۋدان وتەدى.
