جاڭا وقۋ جىلىندا باتىسقازاقستاندىق ءبىلىم وشاقتارى دا وقۋشىلارعا ەسىكتەرىن ايقارا اشتى. ءبىلىم كۇنىندە پايدالانۋعا بەرىلگەن جاڭا مەكتەپتەر بالالاردىڭ باقىتىن ەسەلەي تۇسكەنى ءسوزسىز.
اتاپ ايتساق، وبلىسىمىزعا قاراستى كازتالوۆ جانە بايتەرەك اۋداندارىندا قوس بىردەي جاڭا مەكتەپ ەل يگىلىگىنە بەرىلدى. بۇل تۋرالى وبلىستىق ءبىلىم بەرۋ باسقارماسىنىڭ ءباسپاسوز قىزمەتى حابارلادى.
بايتەرەك اۋدانىنداعى بايقونىس اۋىلىندا قادىر مىرزا ءالى اتىنداعى جالپى ورتا ءبىلىم بەرەتىن قازاق مەكتەبىنىڭ وقۋشىلارى مەن ۇستازدارى كەزەكتى وقۋ جىلىن جاڭا عيماراتتا باستادى. مەكتەپتىڭ اشىلۋ سالتاناتىنا قاتىسقان وبلىس اكىمى نارمان تورەعاليەۆ وقىتۋشىلار مەن شاكىرتتەردى، اتا-انالاردى جاڭا وقۋ جىلىمەن قۇتتىقتادى. ارداگەر ۇستاز قۋانىش تاۋباي جەرلەستەرى ءۇشىن بۇل وقيعانىڭ تاريحي ءسات ەكەنىن جاسىرمادى. سۋ جاڭا مەكتەپتىڭ كىلتىن «Antarium Group» جشس باس ديرەكتورى ەرلان اتاجان تابىستادى.
زاماناۋي ءبىلىم بەرۋ تالاپتارىنا ساي تولىق جابدىقتالعان كەڭ ءارى جارىق جاڭا مەكتەپتە STEM, روبوتوتەحنيكا، ۆيزۋالدى ديزاين، حورەوگرافيا كابينەتتەرى، ەرەكشە ءبىلىمدى قاجەت ەتەتىن بالالارعا ارنالعان سەنسورلىق جانە ينكليۋزيۆتى وقۋ بولمەلەرى، سپورت جانە اكت زالدارى بار.
كازتالوۆ اۋدانىنا قاراستى قونىس اۋىلىندا پايدالانۋعا بەرىلگەن جاڭا مەكتەپ 60 بالاعا ارنالعان. ءبىلىم ورداسىنىڭ سالتاناتتى اشىلۋىنا قاتىسقان وبلىس اكىمىنىڭ ورىنباسارى قايىرجان مەڭدىعاليەۆ بۇل يگى ءىستىڭ مەملەكەت، بيزنەس جانە قوعام اراسىنداعى ءتيىمدى سەرىكتەستىكتىڭ ناتيجەسى ەكەنىن اتاپ ءوتتى. سەبەبى، بۇل نىسان «قاراشىعاناق پەتروليۋم وپەرەيتينگ ب.ۆ.» كومپانياسىنىڭ الەۋمەتتىك جاۋاپكەرشىلىگى اياسىندا بوي كوتەرگەن بولاتىن. سونىمەن قاتار سالتاناتتى شارادا ءوڭىر باسشىسىنىڭ اتىنان مەكتەپ ۇجىمىنا LED ەكران سىيعا بەرىلدى. اۋدان اكىمى اسلانبەك سارقۇلوۆ مەردىگەر «Smartech» جشس ديرەكتورى جانىبەك بايعاتوۆقا مەكتەپ قۇرىلىسىن ساپالى جۇرگىزىپ، ۋاقتىلى اياقتاعانى ءۇشىن العىس حات تابىس ەتتى.
ۇستازدار مەن وقۋشىلاردى قۇتتىقتاعان ارداگەر ۇستاز جاۋھار ساپارعاليەۆا بۇل كۇننىڭ تاريحي ماڭىزى زور ەكەنىن ايتتى:
– جاڭا مەكتەپ – بولاشاق ۇرپاققا جاسالعان زور قامقورلىق، ەل ەرتەڭىنە دەگەن جاناشىرلىقتىڭ جارقىن كورىنىسى. بۇل قۋانىشتى ءسات تاريحىمىزدىڭ جارقىن بەتتەرىنىڭ ءبىرى بولارى ءسوزسىز، – دەدى جۇرەكجاردى لەبىزىن جەتكىزگەن ۇلاعاتتى ۇستاز.
تاريحقا كوز جۇگىرتسەك، قونىس اۋىلىندا العاشقى مەكتەپتىڭ ىرگەتاسى 1948 جىلى سالىنعان ەكەن. باستاپقىدا جەتى جىلدىق مەكتەپ بولىپ اشىلىپ، ءار جىلدارى ءتۇرلى قۇرىلىمدىق وزگەرىستەرگە ۇشىراعان ءبىلىم ورداسى 1979-1980 وقۋ جىلىندا ورتا مەكتەپ بولىپ قايتا قۇرىلىپ، 1980 جىلى العاشقى تۇلەكتەرىن ۇشىرعان. زامان تالابىنا ساي جابدىقتالعان ءبىلىم ورداسىندا 11 وقۋ كابينەتى، سپورت زالى، اسحانا، كىتاپحانا، ءماجىلىس زالى قاراستىرىلعان.
قوس ءبىلىم وشاعى دا مەملەكەت باسشىسىنىڭ ءۇش اۋىسىمدى جانە اپاتتى مەكتەپتەردىڭ سانىن ازايتۋ تۋرالى تاپسىرماسىنا سايكەس سالىندى. جالپى باتىس قازاقستان وبلىسىندا بارلىعى 379 مەكتەپ جۇمىس جاسايدى. ولاردا 126 مىڭنان استام وقۋشى ءبىلىم الادى. ال كازتالوۆ اۋدانىنداعى 35 مەكتەپتە 5 مىڭنان استام بالا وقيدى.
ۇقساس جاڭالىقتار
