2026 جىلعى 18–21 ماۋسىم ارالىعىندا قازاقستان رەسپۋبليكاسى پرەزيدەنتى جانىنداعى ۇلتتىق عىلىم اكادەمياسىنىڭ «حالىقارالىق قاتىناستار» زەرتتەۋ ورتالىعى مەن ءال-فارابي اتىنداعى قازاق ۇلتتىق ۋنيۆەرسيتەتى حالىقارالىق قاتىناستار فاكۋلتەتىنىڭ «ايماقتىق قاتىناستاردى تالداۋ» عىلىمي-زەرتتەۋ ورتالىعىنىڭ ۇيىمداستىرۋىمەن وتكەن «قازاق-قىرعىز عىلىمي ىنتىماقتاستىعى: ورتاق مۇددەلەر مەن ەرەكشەلىكتەر» حالىقارالىق فورۋمى اياسىندا ماڭىزدى عىلىمي وقيعا ورىن الدى.
فورۋم شەڭبەرىندە العاش رەت قازاقستان مەن قىرعىزستان اراسىنداعى ەكىجاقتى قاتىناستارعا ارنالعان «گەوساياسي ىعىسۋلار جاعدايىنداعى قازاقستان–قىرعىزستان قاتىناستارى: دامۋ ماسەلەلەرى مەن پەرسپەكتيۆالارى» تاقىرىبىنداعى دوكتورلىق ديسسەرتاتسيا ءساتتى قورعالدى. زەرتتەۋ جۇمىسى ەكى ەل اراسىنداعى ساياسي، ەكونوميكالىق جانە گۋمانيتارلىق بايلانىستاردى حالىقارالىق قاتىناستار تەورياسى مەن قازىرگى گەوساياسي ۇدەرىستەر كونتەكستىندە كەشەندى تۇردە قاراستىرۋىمەن ەرەكشەلەنەدى.
ديسسەرتاتسيالىق زەرتتەۋدىڭ وزەكتىلىگى قازىرگى حالىقارالىق جۇيەدەگى ترانسفورماتسيالار جاعدايىندا قازاقستان مەن قىرعىزستان اراسىنداعى ستراتەگيالىق سەرىكتەستىكتىڭ مازمۇنى مەن بولاشاعىن عىلىمي تۇرعىدان زەردەلەۋ قاجەتتىلىگىمەن ايقىندالادى. زەرتتەۋ بارىسىندا ەكىجاقتى قاتىناستاردىڭ نەگىزگى كەزەڭدەرى، ولاردىڭ دامۋ ديناميكاسى، وڭىرلىك قاۋىپسىزدىك ماسەلەلەرى، ينتەگراتسيالىق پروتسەستەر جانە ورتالىق ازياداعى گەوساياسي وزگەرىستەردىڭ ىقپالى جان-جاقتى تالداندى.
زەرتتەۋ ناتيجەلەرى قازاقستان مەن قىرعىزستان اراسىنداعى ىنتىماقتاستىقتىڭ دامۋ ۇردىستەرىن تەرەڭ تۇسىنۋگە مۇمكىندىك بەرىپ قانا قويماي، ەكىجاقتى قاتىناستاردى ودان ءارى جەتىلدىرۋگە باعىتتالعان عىلىمي نەگىزدەلگەن ۇسىنىستاردى قالىپتاستىرۋعا ىقپال ەتەدى. سونىمەن قاتار، جۇمىس حالىقارالىق قاتىناستار، ايماقتانۋ جانە ورتالىق ازيانى زەرتتەۋ باعىتتارىنداعى عىلىمي ادەبيەتتەر قورىن تولىقتىراتىن ماڭىزدى اكادەميالىق ەڭبەك بولىپ تابىلادى.
فورۋم اياسىندا قازاقستان مەن قىرعىزستاننىڭ عىلىمي جانە ساراپشىلىق قاۋىمداستىقتارى اراسىندا مازمۇندى پىكىر الماسۋ ۇيىمداستىرىلىپ، ەكى ەل اراسىنداعى عىلىمي ىنتىماقتاستىقتى كەڭەيتۋگە باعىتتالعان بىرقاتار ۇسىنىستار ايتىلدى. قاتىسۋشىلار وڭىرلىك زەرتتەۋلەر سالاسىنداعى بىرلەسكەن جوبالاردى دامىتۋ، اكادەميالىق ۇتقىرلىقتى ارتتىرۋ جانە عىلىمي اقپارات الماسۋدى جۇيەلى تۇردە جالعاستىرۋ قاجەتتىگىن اتاپ ءوتتى.
فورۋم قورىتىندىسى بويىنشا قاتىسۋشىلار قازاقستان مەن قىرعىزستان اراسىنداعى دوستىق، تاتۋ كورشىلىك جانە ستراتەگيالىق سەرىكتەستىك قاتىناستارىن نىعايتۋعا باعىتتالعان عىلىمي زەرتتەۋلەر مەن ساراپشىلىق ديالوگتى ودان ءارى دامىتۋ قاجەتتىگىن اتاپ ءوتتى.
