2 قىركۇيەك كۇنى قىرعىزستان الپينيزم جانە سپورتتىق قۇزعا ورمەلەۋ فەدەراتسياسىنىڭ پرەزيدەنتى ەدۋارد كۋباتوۆ Instagram پاراقشاسىندا جەڭىس شىڭىنان بەينەجازبا جاريالاپ، رەسەيلىك ناتاليا ناگوۆيتسىنا قازا تاپقانىن راستادى، دەپ حابارلايدى "ادىرنا" ۇلتتىق پورتالى.
ەدۋارد كۋباتوۆ جازباسىندا كادرلاردىڭ جەڭىس شىڭىنداعى «وڭتۇستىك ەنيلچەك» بازالىق لاگەرىندە تۇسىرىلگەنىن ايتتى. مۇندا بيىكتىككە ارنالعان دروننىڭ كومەگىمەن ەكى رەت ەگجەي-تەگجەيلى ۆيزۋالدى تەكسەرۋ جۇرگىزىلگەن.
«وكىنىشكە قاراي، ناتاليا ناگوۆيتسىنانىڭ ءتىرى ەكەندىگىن كورسەتەتىن ەشقانداي بەلگى جوق ەكەنىن راستاۋعا ءماجبۇرمىز. بارلىق قۇتقارۋ جۇمىستارى توقتاتىلدى، ءارى بۇل بارلىعىمىز ءۇشىن قايعىلى فاكتىنى مويىنداۋىمىز كەرەك. تەكسەرۋ جۇمىستارىنىڭ بارلىق بەينەماتەريالدارى (10 مينۋتتان استام) ناتاليانىڭ ۇلىنا جەكە تابىستالادى»، – دەدى كۋباتوۆ.
ول قىرعىز تاراپىنان ءالپينيستى قۇتقارۋ ءۇشىن مۇمكىن بولعان بارلىق شارالار جاسالعانىن، الايدا اسا بيىك شىڭ، قولايسىز اۋا رايى، تىكۇشاقتىڭ قيىن قونۋى جانە قۇتقارۋشىلاردىڭ فيزيكالىق جاعدايى كۇتكەن ناتيجەگە قول جەتكىزۋگە مۇمكىندىك بەرمەگەنىن اتاپ ءوتتى.
«جەڭىس شىڭىنداعى 7200 مەتر بيىكتىكتە بىردە-ءبىر ءساتتى قۇتقارۋ وپەراتسياسى تاريحتا بولماعان. ءبىز الپينيست-قۇتقارۋشىلاردىڭ ءومىرىن ودان ءارى قاتەرگە تىگۋدى دۇرىس دەپ سانامادىق. ۇكىمەتكە، قورعانىس مينيسترلىگىنە، اسكەري ۇشقىشتارعا، قۇتقارۋشىلارعا، الپينيستەرگە جانە قۇتقارۋ شارالارىن ۇيىمداستىرۋعا اتسالىسقان بارشاعا العىس بىلدىرەمىز… »، – دەدى ول.
ەسكە سالساق، 12 تامىزدا رەسەي ازاماتى ناتاليا ناگوۆيتسىنا جەڭىس شىڭىنا (7200 م) كوتەرىلىپ بارا جاتقاندا اياعىن سىندىرىپ العان. 23 تامىزدا قىرعىزستاننىڭ رەسمي ورگاندارى 47 جاستاعى ايەلدىڭ قازا بولعانىن بولجاپ مالىمدەگەن. سوعان قاراماستان، وقيعا ورنىنا ەۆروكوپتەرمەن ۇشۋ جوسپارلانعان، بىراق اۋا رايىنىڭ قولايسىزدىعىنا بايلانىستى ول ورىندالمادى. ماماندار ناتاليانىڭ دەنەسى كوكتەمگە دەيىن تاۋدا قالاتىنىن ايتقان ەدى.
الايدا ونىڭ ۇلى الەۋمەتتىك جەلىدە بيلىككە جۇگىنىپ، اناسىن قۇتقارۋعا كومەك سۇراعان ەدى.
ايتا كەتەيىك، بۇعان دەيىن قىرعىزستاندا «جەڭىس» شىڭىن باعىندىرۋ بارىسىندا جوعالىپ كەتكەن يراندىق الپينيستەر حاسسان ماشحاديوگلۋ مەن ماريام پيلەحۆاري قازا تاپتى دەپ تانىلعان بولاتىن.
