بەيجىڭدەگى تيانانمەن الاڭىندا ەكىنشى دۇنيەجۇزىلىك سوعىستىڭ اياقتالعانىنا 80 جىل تولۋىنا ارنالعان ءىرى اسكەري پاراد ءوتتى، دەپ حابارلايدى "ادىرنا" ۇلتتىق پورتالى BBC-گە سىلتەمە جاساپ.
پارادقا قاتىسۋشى قۇرمەتتى قوناق رەتىندە رەسەي پرەزيدەنتى ۆلاديمير پۋتين مەن كحدر ليدەرى كيم چەن ىن اتالدى. مەملەكەت باسشىسى قاسىم-جومارت توقاەۆ تا سالتاناتتى قابىلداۋعا قاتىستى. سونداي-اق، شارادا 26-دان استام مەملەكەتتىڭ باسشىلارى بولدى.
اسكەري شەرۋدە قىتاي حالىق-ازاتتىق ارمياسى العاش رەت ستراتەگيالىق يادرولىق ۇشتاعانىنا كىرەتىن زىمىرانداردى كورسەتتى. ولاردىڭ قاتارىندا الىس قاشىقتىققا ۇشاتىن اۋە زىمىرانى «تسزينلەي-1»، سۋ استىنان ۇشىرىلاتىن قۇرلىقارالىق زىمىران «تسزيۋيلان-3»، قۇرلىقتان ۇشىرىلاتىن «دۋنفەن-61» جانە «دۋنفەن-31» زىمىراندارى بار. بۇدان بولەك، بۇكىل جەر شارىن قامتي الاتىن سوققى راديۋسىنا يە ستراتەگيالىق يادرولىق DF-5C زىمىرانى، زاماناۋي لازەرلىك قارۋ جانە جاڭا سۋاستى درونى AJX002 تانىستىرىلدى.
پاراد باستالعان ساتتە اقش پرەزيدەنتى دونالد ترامپ الەۋمەتتىك جەلىدە قىتاي باسشىلىعى مەن قوناقتارعا قاتىستى جازبا جاريالاپ، قىتايدىڭ ازاتتىعى جولىندا امەريكالىقتاردىڭ دا قازا تاپقانىن ەسكە سالدى. ول قىتاي حالقىنا مەرەكەلىك كۇن تىلەپ، پۋتين مەن كيم چەن ىنعا جىلى سالەم جولدادى، الايدا ءوز سوزىندە قىتاي مەن رەسەي، كحدر اراسىنداعى «استىرتىن جوسپارعا» مەڭزەۋ جاسادى.
