اقش پرەزيدەنتى دونالد ترامپ جاقىن ارادا رەسەي پرەزيدەنتى ۆلاديمير پۋتينمەن سويلەسۋدى جوسپارلاپ وتىر. بۇل تۋرالى ول بۇگىن اق ۇيدە وتكەن بريفينگتە ايتتى، دەپ حابارلايدى “ادىرنا”.
ال وسىعان بايلانىستى رەسەي پرەزيدەنتىنىڭ ءباسپاسوز حاتشىسى دميتري پەسكوۆتىڭ ايتۋىنشا، كرەملدە رەسەي مەن اقش پرەزيدەنتتەرى اراسىنداعى تەلەفون ارقىلى سويلەسۋدى ۇيىمداستىرۋعا قاتىستى ازىرگە ناقتى جوسپار جوق. دەگەنمەن، مۇنداي اڭگىمە «جىلدام ۇيىمداستىرىلۋى مۇمكىن»، – دەپ حابارلادى “ينتەرفاكس”
بۇعان دەيىن دونالد ترامپ ۋكراينا پرەزيدەنتى ۆلاديمير زەلەنسكيمەن جانە «قالاۋشىلار كواليتسياسىنىڭ» وكىلدەرىمەن تەلەفون ارقىلى سويلەسكەن بولاتىن. بۇل كەلىسسوزدەر زەلەنسكيدىڭ پاريجگە ساپارى كەزىندە ءوتتى. وندا كيەۆكە قاۋىپسىزدىك كەپىلدىكتەرى ماسەلەسى تالقىلاندى.
Reuters اگەنتتىگىنىڭ مالىمەتىنشە، ترامپ ەۋروپالىق كوشباسشىلارمەن ءبىر ساعاتقا سوزىلعان اڭگىمە بارىسىندا ولاردى رەسەي مۇنايىن ساتىپ الۋدى توقتاتۋعا جانە رەسەيدىڭ ۋكرايناداعى سوعىسىنا قارجىلاي قولداۋ كورسەتىپ وتىرعان قىتايعا ەكونوميكالىق قىسىم جاساۋعا شاقىرعان.
ۆلاديمير زەلەنسكيدىڭ ايتۋىنشا، «قالاۋشىلار كواليتسياسىنىڭ» وكىلدەرى ۋكرايناعا ارنالعان قاۋىپسىزدىك كەپىلدىكتەرىنىڭ جالپى شەڭبەرى بويىنشا كەلىسىمگە كەلگەن. ول قاۋىپسىزدىك سالاسىندا باستى ءرولدى ۋكراينا قارۋلى كۇشتەرى (قكۋ) اتقاراتىنىن ناقتىلادى. سونىمەن قاتار، 4 قىركۇيەكتە پاريجدە وتكەن كەزدەسۋگە قاتىسۋشىلار رەسەيدىڭ ۋكرايناعا قارسى سوعىستى توقتاتۋعا باعىتتالعان كەز كەلگەن بەيبىت باستامانى قابىلداماي وتىرعانىن اتاپ ءوتتى.
فرانتسيا پرەزيدەنتى ەممانۋەل ماكرون ءوز كەزەگىندە ۋكراينادا اتىس توقتاعاننان كەيىن بەيبىتشىلىك ميسسياسىنا قاتىسۋعا 26 ەل نيەت ءبىلدىرىپ وتىرعانىن ايتتى.
«بۇل ەلدەر ۋكرايناعا ءوز اسكەري كونتينگەنتىن جىبەرۋگە نەمەسە تەڭىز بەن اۋە قاۋىپسىزدىگىن قامتاماسىز ەتۋ ءۇشىن قاجەتتى رەسۋرستار بولۋگە رەسمي تۇردە كەلىسىم بەرگەن»، – دەپ ءتۇسىندىردى ماكرون.
