تۇركىستان وبلىسى، ورداباسى اۋدانىنداعى بوگەن سۋ قويماسىنان ارحەولوگيالىق ماڭىزى زور تاريحي جادىگەرلەر تابىلدى. بۇل تۋرالى Zhanibekov University ارحەولوگيالىق ورتالىعىنىڭ زەرتتەۋشىلەرى مالىمدەدى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
بيىل جىل باسىنان باستالعان قۋاڭشىلىقتىڭ سالدارىنان قويمانىڭ ارناسى تارىلعان ەدى. سۋ قويماسى استىندا قالعان تاريحي-مادەني ەسكەرتكىشتەرگە ەكسپەديتسيا ءبىر اپتاعا جالعاسىپ، ناتيجەسىندە قۇندى جادىگەرلەر تابىلدى.
عىلىم جانە جوعارى ءبىلىم مينيسترلىگى مالىمەتىنشە، بۇل جادىگەرلەر – كەيىنگى پالەوليت پەن مەزوليت كەزەڭىنە تيەسىلى ەڭبەك قۇرالدارى. ءبىر جەردە شوعىرلانعان كەيىنگى پالەوليت كەزەڭىنە تيەسىلى 10-عا جۋىق حالتسەدون تاسى، نۋكلەۋستەر جانە كەسۋگە، جونۋعا ارنالعان تاس پلاستينالار بار.
سۋ ەروزيتسياسى ناتيجەسىندە تاس كەزەڭىنە تيەسىلى جادىگەرلەر مۇقيات زەرتتەلىندى.
سونىمەن قاتار كەيىنگى قولا داۋىرىنە جاتاتىن بىرنەشە جەرلەۋ ورىندارىنا قازبا جۇمىستارى جۇرگىزىلدى. جەرلەۋ ورنىندا ادام مۇردەسى ناشار ساقتالعان. سىرتى گەومەتريالىق سىزىقتارمەن بەزەندىرىلگەن كەراميكالىق ىدىستار، سونداي-اق ورتاڭعى بولىگى قولادان جاسالىپ، سىرتى التىنمەن كومكەرىلىپ قاپتالعان ساماي اشەكەيىن ەرەكشە ايتۋعا بولادى. شىعىرشىق، قولادان جاسالىنعان قوس بىلەزىك، كەنەرلى سىرعا مەن باس كيىمدى اسەمدەۋگە پايدالانعان كوپتەگەن ۇساق مونشاقتار دا تابىلدى.
ارحەولوگيالىق ورتالىق جەتەكشىسى ا.پودۋشكين، عىلىمي قىزمەتكەر گ.ستامقۇلوۆانىڭ ايتۋىنشا، تۇركىستان وبلىسى اۋماعىنان ءالى كۇنگە دەيىن بۇل كەزەڭگە تيەسىلى وسىنداي بۇيىمدار تابىلماعان.
ەكسپەديتسيا كەزىندە قاڭلى-سارمات كەزەڭىنە جاتاتىن جەرلەۋ ورنى دا انىقتالدى. بۇل جەردە جاۋىنگەردىڭ جانىنان ءۇش قاناتتى، قاناتتارى تومەنگە قاراتىلعان ساپتى جەبە ۇشتارى، تۇرمىستىق پىشاق، قۇمىرا جانە توعا تابىلدى. ب.ز.د. ءى ع. – ب.ز. ءى ع. مەرزىمدەلەدى. بۇعان قاراپ وڭىردە كونە داۋىردەن باستاپ ادامداردىڭ تولاسسىز مەكەندەۋى جالعاسىپ وتىرعانىن بايقاۋعا بولادى.
قازبا جۇمىستارى وڭىردەگى ۇلتتىق تاريحي-مادەني قورىق قىزمەتكەرلەرىمەن بىرلەسىپ اتقارىلدى. جادىگەرلەر زەردەلەنىپ، كەيىننەن مۇراجايعا وتكىزىلەدى.
