Türkıstan oblysy, Ordabasy audanyndaǧy Bögen su qoimasynan arheologiialyq maŋyzy zor tarihi jädıgerler tabyldy. Būl turaly Zhanibekov University arheologiialyq ortalyǧynyŋ zertteuşılerı mälımdedı, dep habarlaidy “Adyrna” ūlttyq portaly QazAqparatqa sıltep.
Biyl jyl basynan bastalǧan quaŋşylyqtyŋ saldarynan qoimanyŋ arnasy tarylǧan edı. Su qoimasy astynda qalǧan tarihi-mädeni eskertkışterge ekspedisiia bır aptaǧa jalǧasyp, nätijesınde qūndy jädıgerler tabyldy.
Ǧylym jäne joǧary bılım ministrlıgı mälımetınşe, būl jädıgerler – keiıngı paleolit pen mezolit kezeŋıne tiesılı eŋbek qūraldary. Bır jerde şoǧyrlanǧan keiıngı paleolit kezeŋıne tiesılı 10-ǧa juyq halsedon tasy, nukleuster jäne kesuge, jonuǧa arnalǧan tas plastinalar bar.
Su erozisiiasy nätijesınde tas kezeŋıne tiesılı jädıgerler mūqiiat zerttelındı.
Sonymen qatar keiıngı qola däuırıne jatatyn bırneşe jerleu oryndaryna qazba jūmystary jürgızıldı. Jerleu ornynda adam mürdesı naşar saqtalǧan. Syrty geometriialyq syzyqtarmen bezendırılgen keramikalyq ydystar, sondai-aq ortaŋǧy bölıgı qoladan jasalyp, syrty altynmen kömkerılıp qaptalǧan samai äşekeiın erekşe aituǧa bolady. Şyǧyrşyq, qoladan jasalynǧan qos bılezık, kenerlı syrǧa men bas kiımdı äsemdeuge paidalanǧan köptegen ūsaq monşaqtar da tabyldy.
Arheologiialyq ortalyq jetekşısı A.Poduşkin, ǧylymi qyzmetker G.Stamqūlovanyŋ aituynşa, Türkıstan oblysy aumaǧynan älı künge deiın būl kezeŋge tiesılı osyndai būiymdar tabylmaǧan.
Ekspedisiia kezınde qaŋly-sarmat kezeŋıne jatatyn jerleu orny da anyqtaldy. Būl jerde jauyngerdıŋ janynan üş qanatty, qanattary tömenge qaratylǧan sapty jebe ūştary, tūrmystyq pyşaq, qūmyra jäne toǧa tabyldy. B.z.d. I ǧ. – b.z. I ǧ. merzımdeledı. Būǧan qarap öŋırde köne däuırden bastap adamdardyŋ tolassyz mekendeuı jalǧasyp otyrǧanyn baiqauǧa bolady.
Qazba jūmystary öŋırdegı Ūlttyq tarihi-mädeni qoryq qyzmetkerlerımen bırlesıp atqaryldy. Jädıgerler zerdelenıp, keiınnen mūrajaiǧa ötkızıledı.
