8 قىركۇيەكتە فرانتسيا پارلامەنتىنىڭ تومەنگى پالاتاسى فرانسۋا بايرۋدىڭ ۇكىمەتىنە سەنىمسىزدىك ءبىلدىردى. ەندى پرەمەر-مينيستر وتستاۆكاعا كەتۋگە ءماجبۇر، دەپ حابارلايدى «ادىرنا» ءتىلشىسى.
بۇل شەشىم ونىڭ توعىز ايلىق وكىلەتتىك مەرزىمىنەن كەيىن، بيۋدجەت ماسەلەسىنە بايلانىستى قابىلدانعان. بايرۋ كابينەتىن قولداپ 194 دەپۋتات داۋىس بەرسە، 364 ادام قارسى داۋىس بەرگەن.
داۋىس بەرۋگە دەيىنگى سوزىندە پرەمەر-مينيستر ەلدىڭ كوپتەگەن ماسەلەسىنە، اسىرەسە، مەملەكەتتىك قارىزدىڭ وسۋىنە توقتالىپ، ۇكىمەت ۇسىنعان قاتاڭ ۇنەمدەۋ شارالارىن اقتاۋعا تىرىستى. ايتۋىنشا، ونىڭ وتستاۆكاعا كەتۋى بۇل ماسەلەلەردى شەشپەيدى.
تامىز ايىنىڭ باسىندا بايرۋ فرانتسيانىڭ مەملەكەتتىك قارىزى ءاربىر سەكۋند سايىن بەس مىڭ ەۋروعا ءوسىپ وتىرعانىن ايتقان ەدى. سونداي-اق سوڭعى رەت تەڭگەرىمدى بيۋدجەت 1974 جىلى ۇسىنىلعانىن ەسكە سالدى. كەيىن ىشكى ىستەر ءمينيسترى بريۋنو رەتايو فرانتسيا ەشقاشان مۇنداي قارجىلىق قۇزدىڭ جيەگىنە تاياپ كورمەگەنىن مالىمدەگەن.
ايتا كەتەيىك، فرانتسيا ۇلتتىق جينالىسىنىڭ دەپۋتاتى، سوتسياليستىك پارتيا وكىلى بوريس ۆاللو فرانسۋا بايرۋعا سەنىم ءبىلدىرۋ جونىندەگى داۋىس بەرۋدىڭ قارساڭىندا سوتسياليستەردىڭ ەلدى باسقارۋعا دايىن ەكەنىن، ەگەر ەممانۋەل ماكرون ءوتىنىش جاساسا، بۇل جاۋاپكەرشىلىكتى الاتىنىن جەتكىزدى. ال ۋلتراوڭشىل «ۇلتتىق بىرلەستىك» پارتياسىنىڭ جەتەكشىسى مارين لە پەن فرانتسيا پرەزيدەنتىن كەزەكتەن تىس پارلامەنت سايلاۋىن وتكىزۋگە شاقىردى.
فرانتسيادا ۇكىمەتتىك داعدارىستىڭ ۋشىعۋىنا جانە بايرۋدىڭ جاقىن ارادا وتستاۆكاعا كەتۋى مۇمكىن دەگەن بولجامدارعا بايلانىستى انتيۇكىمەتتىك نارازىلىقتار مەن ەرەۋىلدەرگە شاقىرۋلار ايتىلۋدا. كەيبىر كاسىپوداق ەرەۋىلدى 10 قىركۇيەكتەن باستاۋعا ۇندەسە، كوپشىلىگى 18 قىركۇيەكتى جالپىۇلتتىق نارازىلىق كۇنى ەتۋدى جوسپارلاپ وتىر.
فرانسۋا بايرۋ 1993–1997 جىلدارى فرانتسيانىڭ ۇلتتىق ءبىلىم بەرۋ ءمينيسترى بولعان. 2017 جىلى از ۋاقىت ادىلەت مينيسترلىگىن باسقارعان. سونداي-اق ول 2002, 2007 جانە 2012 جىلدارى پرەزيدەنتتىك سايلاۋعا ۇمىتكەر رەتىندە قاتىسقان.
