رەسەي پرەزيدەنتىنىڭ ءباسپاسوز حاتشىسى دميتري پەسكوۆ پرەزيدەنت قاسىم-جومارت توقاەۆتىڭ رەسەيدى تۇركى مەملەكەتتەرى ۇيىمىنىڭ (تمۇ) قۇرامىنا قوسۋ تۋرالى ۇسىنىسىنا قاتىستى سۇراققا جاۋاپ بەردى، دەپ حابارلايدى «ادىرنا» ءتىلشىسى.
«بىزدە حالقى تاريحي شىعۋ تەگى جاعىنان تۇركىلەرگە جاتاتىن بىرقاتار ءوڭىر بار. سوندىقتان مۇنداي قادام ابدەن تۇسىنىكتى ءارى ورىندى بولار ەدى»، – دەدى ول.
رەسەيدە تۇركى حالىقتارىنىڭ باسىم بولىگى تاتارستان، باشقۇرتستان، داعىستان، چۋۆاشيا جانە ياكۋتيا (ساحا) رەسپۋبليكالارىندا تۇرادى. بۇل وڭىرلەردە تاتار، باشقۇرت، چۋۆاش جانە ياكۋت حالىقتارى باسىم.
ەسكە سالايىق، 30 قازاندا قازاقستان پرەزيدەنتى قاسىم-جومارت توقاەۆ انكارادا وتكەن تۇركى مەملەكەتتەرى ۇيىمىنىڭ 13-سامميتىندە سويلەگەن سوزىندە رەسەيگە تۇركى مەملەكەتتەرى ۇيىمىنا قوسىلۋدى نەمەسە ۇيىم جانىنان باقىلاۋشى مارتەبەسىن الۋدى ۇسىنعان بولاتىن.
“ۇيىمىمىزدىڭ بەدەلىن ارتتىرۋ ءۇشىن رەسەيدىڭ نيەتىنە وڭ پىكىرىمىزدى ءبىلدىرىپ، بۇل ەلدى وسى فورماتقا قوسىلۋعا نەمەسە ۇيىمعا باقىلاۋشى رەتىندە قاتىسۋعا شاقىرساق، دۇرىس ءارى ادىلەتتى شەشىم بولار ەدى. ويتكەنى رەسەي ءىرى مەملەكەت رەتىندە كونە زاماننان بەرى تۇركى الەمىمەن تىعىز بايلانىستا بولعان. بۇل ەلدە تاريحي مەكەنىن تاپقان تۇركى حالىقتارى كوپ. قازىرگى تاڭدا رەسەي «التاي ءوڭىرى – تۇركى وركەنيەتىنىڭ التىن بەسىگى» دەگەن تۇجىرىمدامانى دارىپتەۋدە. قازاقستان بۇل تۇجىرىمدامانى قولدايدى. ورىس تىلىندە تۇركى تىلدەرىنەن تامىر تارتاتىن سوزدەر دە از ەمەس. جالپى، رەسەي تۇركى ەلدەرىنىڭ، ياعني ءبىزدىڭ ۇيىمنىڭ ءبىر بولىگى بولسا، بارىمىزگە پايداسىن تيگىزەر ەدى",- دەگەن ەدى پرەزيدەنت توقاەۆ.
