تۇركيا استاناسى انكارا قازاقستان پرەزيدەنتى قاسىم-جومارت توقاەۆتىڭ رەسمي ساپارىنا دايىندالدى. قالا كوشەلەرىندەگى ەلەكتروندى ەكرانداردان ەكى ەل باسشىسىنىڭ پورترەتتەرى كورسەتىلىپ، عيماراتتار قازاقستان مەن تۇركيانىڭ مەملەكەتتىك تۋلارى ارقىلى بەزەندىرىلدى. ال ەتيمەسگۋت اۋەجايىندا مەملەكەت باسشىسىن تۇركيا پرەزيدەنتى رەجەپ تايىپ ەردوعاننىڭ ءوزى قارسى الدى.
انكارا كوشەلەرىندەگى دايىندىق بارىسىن قازاقستاندىق جۋرناليستەر الەۋمەتتىك جەلىلەردە جاريالادى. ۇلكەن ەكرانداردان قاسىم-جومارت توقاەۆ پەن رەجەپ تايىپ ەردوعاننىڭ بەينەلەرى كورسەتىلىپ، ولاردىڭ جانىندا قازاق جانە تۇرىك تىلدەرىندە قۇتتىقتاۋ جازۋلارى ورنالاستىرىلعان.
«قازاقستان رەسپۋبليكاسىنىڭ پرەزيدەنتى، جوعارى مارتەبەلى قاسىم-جومارت كەمەلۇلى توقاەۆ مىرزا، تۇركياعا قوش كەلدىڭىز!» دەگەن جازۋ قازاق تىلىندە جاريالانعان.
قازاقستاندىق جۋرناليست سايانا ساناكوۆا انكارا كوشەلەرىندەگى كورىنىستەردى كورسەتىپ، مەملەكەت باسشىسىنىڭ ساپارىنا جاسالعان دايىندىققا نازار اۋداردى.
«انكارانىڭ باستى كوشەلەرىندە، عيماراتتاردىڭ قاسبەتتەرىندە ءبىزدىڭ پرەزيدەنتتىڭ پورترەتى، ال قاسىندا قازاقستان مەن تۇركيانىڭ تۋلارى جەلبىرەپ تۇر»، – دەدى ول.
ءجۋرناليستىڭ ايتۋىنشا، مۇنداي كورىنىستەر رەسمي كەلىسسوزدەر باستالماي تۇرىپ-اق تۇركيا تاراپىنىڭ قازاقستان پرەزيدەنتىنىڭ ساپارىنا ەرەكشە ءمان بەرىپ وتىرعانىن اڭعارتادى.
قازاقستاندىق جۋرناليست ۆەرونيكا ۆيشنەۆسكايا دا توقاەۆتىڭ ساپارىنا ارنالعان قۇتتىقتاۋ ەكراندارىنىڭ كادرلارىن جاريالادى.
پرەزيدەنتتىك ۇشاق پەن قۇرمەتتى قاراۋىل
قازاقستاندىق دەلەگاتسيانىڭ تۇركياعا كەلۋ ءساتىن Qazaqstan ۇلتتىق تەلەارناسىنىڭ ءجۋرناليسى، «اقوردا» باعدارلاماسىنىڭ جۇرگىزۋشىسى اقداريا مۇحادداس تا كورسەتتى. جاريالانعان ۆيدەودا بورتىندا QAZAQSTAN دەگەن جازۋى بار پرەزيدەنتتىك ۇشاق پەن ونىڭ الدىندا ساپ تۇزەگەن تۇرىك قۇرمەتتى قاراۋىلى بەينەلەنگەن.
اقوردانىڭ مالىمەتىنشە، ەتيمەسگۋت اۋەجايىندا قاسىم-جومارت توقاەۆتى رەجەپ تايىپ ەردوعان جەكە ءوزى قارسى العان.
پرەزيدەنتتەر قانداي ماسەلەلەردى تالقىلايدى؟
قاسىم-جومارت توقاەۆ تۇركيا پرەزيدەنتى رەجەپ تايىپ ەردوعاننىڭ شاقىرۋىمەن رەسمي ساپارمەن باردى. كەزدەسۋ بارىسىندا ەكى ەل اراسىنداعى كەڭەيتىلگەن ستراتەگيالىق ارىپتەستىكتى ودان ءارى دامىتۋ ماسەلەلەرى تالقىلانادى.
تۇركيانىڭ A Haber تەلەارناسىنىڭ حابارلاۋىنشا، كەلىسسوزدەردە ەكىجاقتى قارىم-قاتىناستار، ەنەرگەتيكا، ساۋدا جانە وڭىرلىك ماسەلەلەرگە باسىمدىق بەرىلۋى مۇمكىن.
ساپار باعدارلاماسىنا سايكەس، قازاقستان پرەزيدەنتى تۇركى مەملەكەتتەرى ۇيىمىنىڭ 13-سامميتىنە دە قاتىسادى.
