قىرعىزستان پارلامەنتىنىڭ سالالىق كوميتەتى جالالاباد قالاسىنىڭ اتاۋىن ماناس دەپ وزگەرتۋ تۋرالى زاڭ جوباسىن بىردەن ءۇش وقىلىمدا ماقۇلدادى. بۇل شەشىم 9 قىركۇيەكتەگى وتىرىستا قابىلداندى، دەپ حابارلايدى «ادىرنا» ءتىلشىسى.
الداعى ۋاقىتتا قۇجاتتى پارلامەنتتىڭ جالپى وتىرىسىندا قاراۋ جوسپارلانىپ وتىر.
قالا اتاۋىن وزگەرتۋگە بيۋدجەتتەن 15 ملن سوم (شامامەن 171,5 مىڭ دوللار) بولىنبەك. جالالاباد اكىمى ەرنيسبەك ورموكەەۆ بۇل ۇسىنىستى قالالىق كەڭەسكە ەنگىزىپ، دەپۋتاتتار ونى ءبىراۋىزدان قولدادى. شەنەۋنىكتىڭ ايتۋىنشا، ۇسىنىس جەرگىلىكتى تۇرعىنداردىڭ وتىنىشىنە نەگىزدەلگەن.
زاڭ جوباسىنا بەرىلگەن انىقتامادا قالا اتاۋىن وزگەرتۋ باستاماسى ۇلتتىق يدەولوگيانى نىعايتۋعا جانە قىرعىز حالقىنىڭ قورعاۋشىسى سانالاتىن ەپوستىق قاھارمان ماناستىڭ ەسىمىن قالاعا بەرۋگە باعىتتالعانى ايتىلعان.
جالالاباد – قىرعىزستانداعى ءۇشىنشى ءىرى قالا. قازىرگى تاڭدا قالا حالقىنىڭ سانى 184 مىڭنان اسادى.
