قازاقستان پرەمەر-ءمينيسترى ولجاس بەكتەنوۆ ەڭبەك جانە حالىقتى الەۋمەتتىك قورعاۋ مينيسترلىگىنە بيىلعى 1 جەلتوقسانعا دەيىن الەۋمەتتىك قولداۋ شارالارىنىڭ بىرىڭعاي ستاندارتىن ازىرلەۋدى تاپسىردى، دەپ حابارلايدى "ادىرنا" ۇلتتىق پورتالى.
«ەڭبەك مينيسترلىگى مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ، الەۋمەتتىك قولداۋ شارالارىنىڭ بارلىق وڭىرگە ارنالعان بىرىڭعاي ستاندارتىن دايىنداۋى قاجەت. بارلىق كۇماندى ءارى ءتيىمسىز الەۋمەتتىك تولەمدەر مەن جاردەماقىلاردى الىپ تاستاۋ كەرەك. ءبىز الەۋمەتتىك ادىلەتتىلىكتى ساقتاپ، ماسىلدىق پيعىلدى ازايتۋ ءۇشىن ناقتى شارالار قابىلدايمىز. ۇكىمەتتىڭ مىندەتى – بارلىعىنا بىردەي جاعداي جاساۋ، ال ازاماتتار جۇمىس ىستەپ، ءوزىن جانە وتباسىن قامتاماسىز ەتۋگە ۇمتىلۋى ءتيىس»، – دەدى ول ۇكىمەت وتىرىسىندا.
سونىمەن قاتار، پرەمەر تسيفرلاندىرۋ جانە جاساندى ينتەللەكت تەحنولوگيالارىن ەنگىزۋ ارقىلى مەملەكەتتىك قىزمەتتەردى باقىلاۋدىڭ جاڭا ادىستەرىن ازىرلەۋ قاجەتتىگىن اتاپ ءوتتى. وسىعان بايلانىستى بەكتەنوۆ 1 قاراشاعا دەيىن ەڭبەك مينيسترلىگى جانىنان الەۋمەتتىك سالانىڭ بىرىڭعاي تسيفرلىق پلاتفورماسىن ىسكە قوسۋدى تاپسىردى.
بۇدان بولەك، مەملەكەتتىك ورگاندارعا الەۋمەتتىك كودەكسكە الەۋمەتتىك اۋديت تەتىكتەرىن ەنگىزۋدى كوزدەيتىن زاڭ جوباسىن جەدەلدەتىپ كەلىسۋ مىندەتتەلدى.
ايتا كەتەيىك، بۇعان دەيىن پرەزيدەنت قاسىم-جومارت توقاەۆ حالىققا جولداۋىندا ۇكىمەت سوڭعى ون بەس جىل بويى ماسىلدىق پەن الەۋمەتتىك الاياقتىقتى قولداپ كەلگەنىن سىنعا العان ەدى.
