قازاقستاندا جاڭا مەملەكەتتىك ينستيتۋت – ۆيتسە-پرەزيدەنت قىزمەتىن ەنگىزۋگە بايلانىستى كونستيتۋتسياعا وزگەرىستەر ەنگىزۋ ۇسىنىلدى، دەپ حابارلايدى “ادىرنا” ۇلتتىق پورتالى.
بۇل تۋرالى پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆ كونستيتۋتسيالىق رەفورما جونىندەگى كوميسسيانىڭ العاشقى وتىرىسىندا مالىمدەدى.
ۇسىنىسقا سايكەس، ۆيتسە-پرەزيدەنتتى پرەزيدەنت قۇرىلتايدىڭ كەلىسىمىمەن، ياعني دەپۋتاتتاردىڭ كوپشىلىك داۋىسى ارقىلى تاعايىندايدى. بۇل ءراسىم پرەمەر-ءمينيستردى تاعايىنداۋ تارتىبىنە ۇقساس بولماق.
ۆيتسە-پرەزيدەنتتى قىزمەتىنەن بوساتۋ قۇزىرەتى دە پرەزيدەنتكە تيەسىلى.
كونستيتۋتسيادا ۆيتسە-پرەزيدەنتتىڭ نەگىزگى وكىلەتتىكتەرىن بەكىتۋ كوزدەلگەن. اتاپ ايتقاندا، ول پرەزيدەنتتىڭ تاپسىرماسىمەن قازاقستاننىڭ حالىقارالىق قاتىناستارداعى مۇددەسىن بىلدىرەدى، قۇرىلتايمەن، ۇكىمەتپەن جانە وزگە دە مەملەكەتتىك ورگاندارمەن ءوزارا ءىس-قيمىلدا پرەزيدەنت اتىنان وكىلدىك ەتەدى. سونىمەن قاتار، پرەزيدەنت اتىنان قوعامدىق-ساياسي، عىلىمي جانە مادەني-اعارتۋشىلىق ۇيىمدارمەن بايلانىس ورناتادى.
ۆيتسە-پرەزيدەنتكە بىرقاتار شەكتەۋلەر دە قويىلادى. ول وكىلدى ورگاننىڭ دەپۋتاتى بولماۋعا، وزگە اقىلى قىزمەت اتقارماۋعا، كاسىپكەرلىكپەن اينالىسپاۋعا جانە وكىلەتتىك مەرزىمىندە ساياسي پارتيا مۇشەسى بولماۋعا ءتيىس.
بۇل تالاپتار ساياسي باسەكەلەستىكتى كۇشەيتۋگە جانە بارلىق پارتيالارعا تەڭ جاعداي جاساۋعا باعىتتالعان.
