اتىراۋ وبلىسىنىڭ ءبىر اۋدانىندا جەرگىلىكتى اۋقىمداعى تابيعي سيپاتتاعى توتەنشە جاعداي ەنگىزىلدى، دەپ حابارلايدى "ادىرنا" ۇلتتىق پورتالى Zakon.kz-كە سىلتەپ.
بۇل شەشىم اۋداندىق اكىمدىك جانىنداعى توتەنشە جاعدايلاردىڭ الدىن الۋ جانە جويۋ جونىندەگى كوميسسيا وتىرىسىنىڭ قورىتىندىسى بويىنشا قابىلداندى.
توتەنشە جاعدايعا قيعاش جانە شارون وزەندەرى مەن ولاردىڭ ارنالارىنىڭ، سونداي-اق كاسپي تەڭىزىنىڭ تارتىلۋى سەبەپ بولدى.
سالدارىنان اۋداننىڭ بالىق شارۋاشىلىعى مەن اۋىل شارۋاشىلىعى زارداپ شەگىپ وتىر. اسىرەسە كانالداردا سۋدىڭ بولماۋى ەگىستىك جەرلەردى سۋارۋدى جانە جايىلىمداردى قامتاماسىز ەتۋدى قيىنداتقان.
«قۇرمانعازى اۋدانى اكىمدىگى جانىنان جەدەل شتاب قۇرىلىپ، ونىڭ جۇمىسىنا اكىم ورىنباسارى مارات حاسانوۆ جەتەكشىلىك ەتەدى. ارنايى ءىس-شارالار جوسپارى بەكىتىلىپ، قاجەتتى تەحنيكالىق جانە قارجىلىق ەسەپتەۋلەر جۇرگىزىلۋدە»، – دەدى وبلىس اكىمى ءباسپاسوز قىزمەتىنىڭ جەتەكشىسى رۋسلان جۇماعازيەۆ.
مامانداردىڭ ايتۋىنشا، سۋدىڭ دەڭگەيىنىڭ تومەندەۋى باعالى بالىق تۇرلەرىنىڭ ۋىلدىرىق شاشۋى مەن كوشۋىنە كەرى اسەرىن تيگىزىپ وتىر. سونىمەن قاتار، شەكارا كۇزەتى، قۇقىق قورعاۋ ورگاندارى جانە بالىق كاسىپورىندارىنىڭ كەمەلەرىنىڭ قوزعالىسى قيىنداعان.
