اتىراۋ وبلىسى اكىمدىگىنىڭ قولداۋىمەن، «قازاقتەلەكوم» اق سەرىكتەستىگىمەن جانە قازاقستان كيبەرسپورت فەدەراتسياسىنىڭ ۇيىمداستىرۋىمەن حالىقارالىق «Atyrau CyberCup 2025» كيبەرسپورت ءتۋرنيرى ءوتىپ جاتىر، – دەپ حابارلايدى وڭىرلىك كوممۋنيكاتسيالار قىزمەتى.
ءىس-شارانىڭ اشىلۋىندا اتىراۋ وبلىسى اكىمىنىڭ ورىنباسارى جاسۇلان بيسەمبيەۆ ءسوز سويلەپ، قاتىسۋشىلارعا ساتتىلىك تىلەدى.
– جارىسقا قاتىساتىن ءاربىر توپ مۇشەسىنە ساتتىلىك تىلەيمىن. بۇعان دەيىن وسىنداي ءىرى تۋرنير كورشىلەس رەسەيدىڭ تاتارستان وڭىرىندە وتسە، كەلەر جىلى ەلىمىزدە استانا قالاسىندا وتەدى دەپ جوسپارلانۋدا. بۇگىنگى ءىس-شارا ءوڭىر جاستارى ءۇشىن ۇلكەن موتيۆاتسيا. كيبەرسپورت – تەك ويىن عانا ەمەس، ول لوگيكالىق ويلاۋ، جىلدام شەشىم قابىلداۋ جانە كوماندالىق جۇمىستى دامىتۋ قۇرالى. وسىنداي جارىستار جاستاردىڭ IT سالاسىنا قىزىعۋشىلىعىن ارتتىرىپ، تسيفرلىق باعىتتاعى جاڭا بۋىندى قالىپتاستىرۋعا ىقپال ەتەدى. بۇگىنگى تۋرنير سونىڭ ايقىن دالەلى، – دەدى وبلىس اكىمىنىڭ ورىنباسارى.
بيىلعى تۋرنيرگە «Counter-Strike» جانە «Dota 2» ويىن تۇرلەرىنەن بارلىعى 167 كوماندا قاتىسۋدا. ال فينالدىق كەزەڭگە ءتورت ۇزدىك توپ جولداما الادى. ويىندار 5x5 فورماتىندا وتۋدە. بۇعان دەيىن ءتۋرنيردىڭ ونلاين كەزەڭىندە «PUBG Mobile» ويىنى بويىنشا فينالدىق باسەكە ۇيىمداستىرىلعان بولاتىن.
قازاقستان كيبەرسپورت فەدەراتسياسىنىڭ سپورتتىق مەنەدجەرى بەيبارىس سەرىكوۆتىڭ ايتۋىنشا، جارىسقا ورتالىق ازيا ەلدەرىنەن — قازاقستان، وزبەكستان، قىرعىزستان، تۇركىمەنستان جانە تاجىكستاننان ويىنشىلار قاتىسۋدا.
– بۇگىنگى فينالدا «Counter-Strike» جانە «Dota 2» بويىنشا قىرعىزستاننان ءبىر جانە قازاقستاننان ءۇش كوماندا باق سىنايدى. جالپى جۇلدە قورى 10 ميلليون تەڭگەنى قۇراپ، ول ءۇش نوميناتسيا بويىنشا ۇلەستىرىلەدى، – دەدى ول.
ايتا كەتەيىك، جالپى تۋرنيرگە 1300-دەن اسا ويىنشى قاتىسىپ وتىر.
