اتىراۋ قالاسىنىڭ تۇرعىنى تاياۋ شىعىستاعى كۇردەلى جاعداي كەزىندە ۇيىمداستىرىلعان ەۆاكۋاتسيا جۇمىستارى ءۇشىن مەملەكەتكە العىس ءبىلدىردى. بۇل تۋرالى ول قازاقستان رەسپۋبليكاسىنىڭ سىرتقى ىستەر مينيسترلىگىنە جولداعان وتىنىشىندە اتاپ وتكەن.
ونىڭ ايتۋىنشا، 28 اقپان كۇنى كاتار ەلىندە دەمالىپ جۇرگەن اتا-ەنەسى ەلگە ۋاقىتىلى ورالا الماعان.
– سول ساتتە قاتتى الاڭدادىق. الىستا جۇرگەن جاقىندارىمىز ءۇشىن بۇكىل وتباسى بولىپ ۋايىمدادىق. اسىرەسە، جاعداي ۋشىعىپ، سوعىس باستالىپ كەتسە، ەلگە قالاي ورالادى دەگەن وي ءبىزدى قاتتى مازالادى، – دەيدى ول.
تۇرعىننىڭ سوزىنشە، جەدەل ۇيىمداستىرىلعان ەۆاكۋاتسيانىڭ ارقاسىندا جاقىندارى امان-ەسەن ەلگە ورالىپ، وتباسىمەن قايتا قاۋىشقان.
– كاتارداعى قازاقستان ەلشىلىگىنىڭ قىزمەتكەرلەرى تاۋلىك بويى بايلانىستا بولىپ، وتانداستارعا بارلىق قاجەتتى كومەكتى كورسەتتى. ءدارى-دارمەكپەن، اۋىزسۋمەن قامتاماسىز ەتتى. مۇنداي قولداۋ ءبىز ءۇشىن اسا ماڭىزدى بولدى، – دەدى ول.
سونداي-اق، ول مەملەكەت باسشىسى قاسىم-جومارت توقاەۆ جۇرگىزىپ وتىرعان ساياساتتى اتاپ ءوتىپ، ەۆاكۋاتسياعا قاتىسقان بارلىق قۇرىلىمدارعا العىس ءبىلدىردى.
– پرەزيدەنتكە، پرەزيدەنت اكىمشىلىگىنە، سىرتقى ىستەر مينيسترلىگىنە، شەتەلدەگى ديپلوماتيالىق وكىلدىكتەر مەن اۋە كومپانيالارىنا ۇلكەن العىسىمدى بىلدىرەمىن. وسىنداي ساتتە مەملەكەت ءوز ازاماتتارىن ەشقاشان نازاردان تىس قالدىرمايتىنىنا تاعى ءبىر مارتە كوز جەتكىزدىك، – دەدى اتىراۋلىق.
ايتا كەتەيىك، قازاقستان تاياۋ شىعىس ەلدەرىنەن ءوز ازاماتتارىن ەۆاكۋاتسيالاۋدى تولىق اياقتادى. سىرتقى ىستەر مينيسترلىگىنىڭ مالىمەتىنشە، ەلگە جالپى سانى 10 275 قازاقستاندىق قايتارىلعان.
